Pujortaqqusinnginnermut akerliusut amerliartorput

marsip 27-at 2007 11:24

Imerniartarfinni neriniartarfinnilu tamanit orninneqarsinnaasuni pujortaqqusinnginnermik danskit naalagaaffiata inatsimmik atuutsitsilernera, imerniartarfiutilinnit 300-nit uparuarneqarpoq.

Pujortaqqusinnginnermik akerliusut illoqarfeeqqani aallarteriarlutik, akerliuneq Københavnimut maanna aamma apuuppoq.

DR’p tusagassiortuata Christian Høi Nielsen-ip imerniartarfiit ilaat ullaakkut ammasartoq alakkarpaa, tassanilu isersimasut pujortaqqusinnginnermut akerliunerat malunnarpoq.

- Imerniartarfimmi Københavnimiittumi Hong Kong-imi ullaanngornerani isersimavunga, maanilu isersimasut nuannannerat aatsaat aallartilaartutut isikkoqarpoq, nerriviillu immiaaqqanik ulikkaarput, inuillu isersimasut pujortaallutik, DR’p tusagassiortua Christian Høi Nielsen oqaluttuarpoq. Politikerilli aalajangiinerat malillugu imerniartarfinni neriniartarfinnilu pujortarneq inerteqqutaalersussaavoq. Imerniartarfimmilu imigassaarniatut sulisoq, Tina Sørensen ima oqaluttuarpoq:

- Pujortartarneq akerlerisimasuugukku, maani sulinavianngikkaluarpunga. Imerniartarfiit aningaasanik isertitsissutigisartagaat tassaapput,

ullut tamaasa aggersartut, taakkualu teqeqqunnguamut ingillutik pujortarusaarlutillu imerusaartarput, taamaammat silamut innersuunenqartalernerat uanga nammineerlunga nuannarivallaanngilara. Aamma pujortartartuutivut silamut innersuuttalerutsigik, ilimagaara aningaasat isertittakkavut ikilissasut, Tina Sørensen naggasiilluni oqarpoq.