Pujortagassat qamiinnaqiuk

Ullumikkut ulloq 31. maj pujortarfiunngitsutut Naalagaaffiit Peqatigiit peqqinnissakkut suleqatigiiffianit nunarsuaq tamakkerlugu ulloritinneqarpoq.

Pujortartartut ikilisinniarlugit nunatsinni ukiuni kingullerni annertuumik iliuuseqartoqartarpoq.

Inuiaqatigiit peqqinnerulernissaannik anguniagaqarnermi, ”Inuuneritta”-mik qulequtalimmi, inuit qanoq pujortarunnaarnissaannik paasititsiniaasoqarpoq. Paarisa atuartunik klassinik pujorneq ajortunik unammisitsilluni ukiut aappassaa ingerlassaqarpoq.

Pujortarunnaarsitsiniaanerit iluaqutaassanersut suli nalunarpoq. Nunatsinni inersimasut 70 procentii pujortartarput, misissuinerillu takutippaat 15-t 17-nillu akornanni ukiullit affaasa missaat pujortartartuusut.

Nunatsinni toqusut tallimararterutaat pujortarneq peqqutigalugu toqusarput.

Pujortartarneq kræfteqalissutaaginnarneq ajorpoq. Ilisimatuut eqqoriarpaat nunatsinni inuit 1.000-t missaanniittut pujortarpallaarnerup kingunerisaanik pualluuteqartut, puallunneq anertikkartitsisarlunilu quersortitsisarpoq.

WHO-mit malunnartinniarneqarpoq nunarsuarmi tamarmi pujortartartut 75 procentii nunani ineriartorfiusumiittuni najugaqarmata. Nunani tamakkunani piitsorpassuaqarfiusuni innuttaasut aningaasaatitik amerlanerit tupanut atortarpaat nerisassanut ilinniagaqarnissamullu atornissaat suli pisariaqarnerugaluartoq.

Ukioq mannalu qulequtaritinneqarpoq ”Tupa piitsuunerlu – en ond cirkel”.