Narsap assiga toqqorsivimmeersoq.

Pujornerani kinguaattoortut: Qaqortumit Narsamut umiatsiartut ujarneqaleraluartut

Umiatsiaaraq marlunnik inuttaqartoq, pujorneranillu kinguaattoorsimasoq, Qaqortup eqqaani ataasinngornermi unnukkut ujaasititsileraluarpoq.

Qaqortumi Politiit ataasinngornermi unnukkut qulip missaani nalunaarfigineqarput umiatsiaaraq marlunnik inuttaqartoq Qaqortumiit Narsamut ingerlaarnermi piffissaq nalinginnaasoq atorlugu tikissimanngitsoq.

Politiit oqarnerat naapertorlugu nalunaaquttap akunnerata ataatsip missaani ingerlaarfigineqartartoq.

- Ilisimatinneqarpugut umiatsiaaqqamik angalasut taakkua marluk puttasinnaasunik atallaarsuaqarsimanngitsut aamma ajunaalernermi kalerrisaarutinik nassataqarsimanngitsut. Taakkuami taamaallaat VHF radio angallattagaq nassatarisimavaat, Søren Bendtsen Politiit pigaartuisa pisortaat oqarpoq.

Taamaattumillu poliitiit Sisak III Qaqortumiit Narsamut imaatigut ingerlaarfigineqartartoq aqqutigisillugu ujaasinermik aallartitsipput.

Bendtsenilu naapertorlugu nalunaaruteqartoqarnerata nalaani silagissimavoq nittaallunili.

Ujarneqartulli namminneerlutik Narsamut marlunngornerup ullaassaani ataasinngulersoq apuussimapput.

- Putsuliussaasimapput pujorunnaarsiillutillu illuaqqat ilaanni uninngaqqaarallarsimapput, Søren Bendtsen oqaluttuarpoq.

Søren Bendtsenip imaani angalasartunut kaammattuutigivaa angalaniartillutik qanigisaminnut qaqagu tikinnissaminnut naatsorsuuteqarnerlutik nalunaaruteqartarnissaannut, taamatullu aamma angalanermini kinguaattoortillutik radioaqqanik allanilluunniit atortorissaarutinik attaveqaatigisinnaasaminnik nassataqartillutik attaveqartaqqullugit.

- Taamaallilluni pisariaqanngitsumik ujaasinerit aallartinneqartaqqunagit, Søren Bendtsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat