Pujoq timmisartuussiniarnernut akornusiivoq
Nuummit Kangerlussuarmut putsernera timmisartuussinermut akornutaasimasoq, Air Greenlandip paasissutissiisartua Tupaarnaq Rosing Olsen ilisimatitsivoq. Air Greenlandip timmisartorsua Norsaq 240-nik ilaasulik Københavnimit ullaap tungaani Kangerlussualiaraluarpoq, putserpallaarnerali pissutigalugu utiinnartariaqarsimalluni.
Danmarkiliartussat 250-it missaanniittut utaqqipput, taakkunannga 150-it Kangerlussuarmiillutik. Utaqqisut sinneri sineriammi sumiiffinni assigiinngitsuniipput. Ilaasut Nuummeersut 70-it Kangerlussuarmi ippassarli
utaqqilerput, Nuummi pujoq pissutigalugu ullaap tungaani timmisartuussisoqarsinnaasimanngimmat.
Kitaani sineriammi timmisartuussinissat allat aamma eqqorneqarput, Maniitsumut, Sisimiunut Aasiannullu timmisartuussinissaagaluit taamaatiinnarneqarsimallutik, taamaattumik timmisartumi issiaviit aqagumut ilaneqarput. Aamma Nuummit Kangerlussuarmut immikkut aqagu timmisartuussinissaq pilersaarutaavoq. Taamatuttaaq Ilulissanit Upernavimmut, Qaanaamut Pituffimmut utimullu timmisartuussinissaq ullumikkut taamaatiinnarneqarpoq, aqaguli timmisartuussinissaq pilersaarutigineqarluni.