Air Greenland: Pujoq suli ajornartorsiortitsivoq
Pujoq ussissoq Kalaallit Nunaata kitaani Air Greenlandip timmisartuinut ajornartorsiortitsisoq suli qaangiutivinngilaq.
Taamaatitsinerit kinguaattoornerillu ullup ingerlanerani pisinnaasut, Air Greenlandimi timmisartuussinermi ataqatigiissarisoq Niels Chemnitz Frederiksen taama ilimasaarivoq.
- Timmisartoq Ilulissanit Qaarsunut ullaap tungaani ingerlaartinneqaraluarpoq, taannali pujornera pissutigalugu -Ilullissanut utertariaqarsimavoq. Timmisartut Nuumminngaanniit aallartussat ullaap tungaani piffissaq eqqorlugu aallarput.
- Nuummingaaniit aallarnissaq ajornartorsiutaanngilaq, minnissarli ajornartorsiutaavoq, Niels Chemnitz Frederiksen oqarpoq
AAMMA ATUARUK Pujorsuup alikkarnissaa ilimananngilaq
Nuna tamakkingajallugu timmisartut kinguaattoorlutillu taamaatinneqarput.
Timmisartuussinerit ataasinngornermi marlunngornerminilu kinguaattoorlutaillu taamaatinneqartut pissutigalugit ilaasussat 500-it missaaniitut eqqorneqarput, ullumilu pingasunngornermi aamma taama amerlatigingajattut eqqorneqassapput.
- 500-it missaanniittut kinguaattoornermik eqqorneqarput, ilaasussallu tamangajammik angalanissamut pilersaarutinik nutaanik tunineqarput. Ualip ingerlanerani timmisartuussinissat iluatsissappata, ajunngitsorujussuussaaq, Air Greenlandimi timmisartuussinermi ataqatigiissaarisoq Niels Chemnitz Frederiksen KNR-imut oqarpoq.
Europami kiassuaq
Europami sapaatip akunnerani kingullermi kiannersua Kalaallit Nunaanut illuariartorpoq. Silaannaq kissartoq immap nillertup nalaanut piguni putsilersarpoq, tamannalu pissutigalugu, Kalaallit Nunaata annersaani ulluni kingullerni timmisartut aallanngitsoorput.
Danmarkimi silasiorfiup DMI-p ilimasaarutaa naapertorlugu, pujortuarallassaaq. Silap allanngornissaa kisimi aalajangiisuussaaq.
AAMMA ATUARUK Aamma ullumi: Air Greenlandip timmisartui putsumit uninngatitaapput
- Naqitsiniissaffik imaluunnit siallerujussuarpat sakkortuumilluunniit anorlilerpat aatsaat pujorunnaarsinnaavoq,
Silassamillu ilimasaarummi taamaattoqarnissaa ilimananngilaq, Lisette Grenbom Danmarkimi silasiorfimmi DMI-mi silasiortoq taama oqarpoq.
Air Greenlandip timmisartuinut ilaasussanut eqqugaasunut ilaaguit, Air Greenlandip ilaasunut kiffartuussivianut telefon 70 12 12-mut attaveqarsinnaavutit.
