Pujoorivik Polenimut nuunneqassanersoq isumaliutigineqarpoq

Royal Greenlandip Glyngøremi sulisuinit 250-init 100-t soraarsitaasinnaanissaat eqqarsaatersuutigineqarpoq. Kapisilinnik qaleralinnillu pujoorivik eqqorneqarsinnaavoq, pujoorivik Polenimut nuussinnaanissaa eqqarsaatersuutigineqarmat.

Suliffissuit taamaaliortarnerat takornartaanngilaq. Danmarkimi suliffiit nioqqutissiornertik nunanut allanut nussortarpaat aningaasanik sipaarniarlutik.

- Danmarkimi akissarsianut aningaasat atorneqartartut amerlavallaarput, assersuutigalugu taasinnaavara Polenimi akunnermut akissarsiat 125 koruunit tikillugit annikinnerussinnaasut. Nioqqutissiornermilu isertitagut annertunerulersissinnaavagut assersuutigalugu Polenimut nuukkaluarutta, Royal Greenlandip pisortaanera Keld Askær oqarpoq.

Erseqqissaatigaa tamanna pillugu suli aalajangiisoqarsimanngitsoq, qaammatillu pingasut-sisamat ingerlanerini aalajangiisoqarumaartoq.

Taava apeqqutaaginnalerpoq Royal Greenlandip nunatsinni nioqqutissiornera qanoq ingerlajumaassanersoq.

Qaleralinnik pujoorivik Paamiuni ingerlanneqariarluni Glyngørimut nuunneqarpoq, taassumallu allamut nuunneqarnissaa kingumut eqqarsaatersuutigineqalerluni.

- Nunatsinni suliffiit attanneqartuaannassappata nioqqutissiorneq pitsaanerulertariaqarpoq, taamaaliortoqanngippat suliffiit annaasinnaassagatsigit, Keld Askær oqarpoq.

Nangipporlu: - Aalisakkanik nioqqutissiorneq patajaallisarneqassappat, taava suliffeqarfiit assigiinngitsut kattuttariaqarput, taamaalinikkut nioqqutissiorneq aqutsinerlu pisariinnerulersinnaassammat, Keld Askær oqarpoq.

Glyngørimi qaleralinnik kapisilinnillu pujoorivik ulluinnarni 100-nik sulisoqarpoq, amerlanerpaagaangamik 250-iusinnaallutik. Glyngørimi nioqqutissiorfik 150-inik allanik aamma sulisoqarpoq, taakku raajaleralutillu oquutalerisuupput, nussuiniarnermilu eqqorneqarnavianngillat.