Pujassaalluarnikkut ujaminnattoqarsinnaavoq

Sisoraatinik oqilaniunnermi nunarput sinnerlugu Arctic Winter Games-imi peqataasussat ujaminnassinnaasutut nalilerneqarput. Peqataasussat immikkut pujassaasoqartussanngorput.
Allattoq Noah Mølgaard
februaarip 07-at 2012 11:28

Sisoraatinik oqilaniunnermi inuusuttut nunanut allanut unammisartut peqataassapput Arctic Winter Games marsip sisamaat Whitehorse-mi ammaanersiorneqalerpat.

Arctic Winter Games-eqartarnerani nunarput sisoraatinik oqilaniunnermi angusarissaartarsimagaluartoq ukiut marluk matuma siorna peqataasut ujamminik susaarput unamminerit Albertami ingerlanneqarmata. Ukiormannali peqataasussat piareersarnerminni pitsaanerusunik atugassaqarput.

Siornarnit aputeqarneruvoq aammalu unammiartussat maannamut marloriarlutik sungiusaqatigeereerlutik.

- Ukiormanna ujaminnannissarput ilimanarsinnaavoq. Suli oqaatigisinnaanngikkaluarpara sorlerni ujaminnakumaarnerluta, nuna tamakkerlugu sungiusaasoq Erik Amondsen KNR-imut taama oqarpoq.

Kalaallit unammisartut siornatigut nammineq pujassaaneq isumagisarsimagaluarpaat, Arctic Winter Games-imi angusarissaartartut Samet aamma Ruslandip ilaani Magadanimeersut immikkut pujassaasoqartartut.

Maanna Siverth Hansen Nuummeersoq pujassaasutut peqataasussanngorpoq. Taanna U-23-it VM-qarnerannit aamma misilittagaqareerpoq.

- Pujassaalluarneq apeqqutaaratarsinnaavoq ujaminnannissamut. Taamaammat Siverth Hansen pujassaasoriniarparput, taassumalu pujassaaneq kisiat isumagissavaa sisorartartullu unamminissartik tamakkiinerusumik piareersarfigisinnaassallugu, Erik Amondsen oqarpoq.

Arctic Winter Games Whitehorse-mi Yukonimiittumi ammaanersiorneqassaaq marsip sisamaat. Sisoraatinik unammersuarnerit aallartissapput ataasinngorneq marsip tallimaat.

Sisoraatinik oqilaniunnermi nunarput sinnerlugu peqataasussat tassaapput:
Angutitsiaq Lynge
Anguteeraq Kleist
Pipaluk Kristensen
Camilla Lynge Hansen
Aqqalu Frederiksen
Salik Olsen
Nukappiannguaq Olsen
Pakkutaq Hansen
Nunni Petersen
Ninni Jeremiassen
Malou Platou Johansen
Aka Olsen