Puisit toqungasut 33-t nassaaraat

Allattoq Mads Lynge
juulip 05-at 2007 07:53

Puisit 33-t Danmarkimi Hesselø-mi Kattegatimiittumi toqungasut Pinngortitamut Qullersaqarfimmi sulisunit ippassaq nassaarineqarput.

Puisit 60-it toqungasut Anholtimi qanittukkut nassaarineqarput, puisillu toqqutigisimasaat sælpest-iusoq taamanikkut ilimagineqarmat, nappaatip taassuma siaruaassimanissaa maanna ilimagineqalerpoq.

Hesselømi toqungasunik ippassaq nassaartoqaraluartoq Anholtimi ippassaq nassaartoqanngilaq. Pinngortitamut Qullersaqarfik taama ilisimatitsivoq.

Naak ilimagineqaraluartoq puisit toqungasut Hesselømiittut sælpestimik nappaateqarlutik toqusimassasut, taamatut inerniliinissaq siusippallaartoq aamma oqaatigineqarpoq.

Puisit Hesselømi nassaarineqartut sapaatip akunneri arlallit matuma siornatigut toqusimammata nappaatip qaangiukkiartornera ilimagineqarpoq.

Puisit toqungasut misissugassaammata tigusiffigineqarput, Veterinærinstitutimilu misissuisoqassaaq.