Puisit sioqqutsillutik piaqqiortut

Eqqumeeqqinnaamik Nunatsiavummi puisit piaraannik takussaasoqalereerpoq, piaqqallu ukioq anigorunnaanngilaat.

Qaammatinik arlalinnik sioqqutillutik puisit piaqqiulersimapput maannalu sooq taama pisoqarsimanersoq paasiniarneqarpoq.

Akilinermi piniartut decembarip aallartinneranili puisit piaraannik takusimallutik nalunaartalerput, sikumilu aataavaqqanik takusarsimallutik.

Nunatsiavumi Tikerarsuarutsip, Maquuviup Aqvituullu eqqaanni takunnittoqarsimavoq. Decembarip qaammataata ingerlanerani Nunatsiavumi naalakkersuisut piniarnermut nakkutilliisoqarfianut aataavaqqanik Nunatsiavuup eqqaani sikumi takusimallutik nalunaartoqallattaalerpoq. Tamannalu eqqumeeqaaq, aataammi aatsaat februaarimi marsimiluunniit piaqqisarmata.

Simon Kohlmeister, biologi Nunatsiavumi naalakkersuisunut sulisoq CBC Newsimut oqarpoq silap ukioq manna eqqumiissimanera aataat piaqqiaarnerannut pisuusinnaasoq. Ukiaq ullorpassuarni Nunatsiavumi upernarpalaarpoq. Kohlmeisterilu nangilluni oqarpoq aataat siusinaarlutik piaqqimmata aataavaqqat uumaanarnissaat ilimananngitsoq. Kohlmesterip Nainimi utoqqaat apersorsimavai, tamarmilli taama aataavaraqaliaartiginera aatsaat takornarpaat.

Aataavaraqaliaarneranik nalunaarutit assigiinngitsut internetikkut oqallinnermik aallartitsisimapput: Sooruna taama pisoqartoq? Ukioq issaasattoq pisuua? Mingutitsineq pisuua? Nunatsiavumilu amerlasuut internetimi oqallinnermi apersorput: Naanguku taakku uumasunik illersuiniat? Aataavaqqat annaattariaqaraluarpaat, internetsimi allattut ilaat taamatut isumaqarput.

Akilinermi puisit piaqqat piniarneqaqqusaanngilluinnarput, taamaammallu aataavaqqat arriitsunnguamik toqujartornissaat ilimagineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat