Puisit sigguttuut Nunatsinni piaqqisarnerat ilimagaat
Pinngortitaleriffimmit aamma Danmarkimi avatangiisinik misissuiffimmit (Danmarks Miljøundersøgelser) ilisimatusartut aatsaavissuaq puisit ilaat sigguttooq (gråsæl) nunatsinniittoq qaammataasanut nassitsissuserpaat.
Pinngortitaleriffimmi ilisimatusartoq Aqqalu Rosing-Asvid aamma Danmarks Miljøundersøgelser-imi ilisimatusartut Rune Dietz, Jonas Teilmann aamma Morten Tange Olsen septembarip aallartinnerani Nunap Isuata eqqaani qeqertaaqqani tammaarsimaartillutik puisinut qassuserput. Qassutinik marlunnik ussupput, aataat pingasut, natseq ataaseq qasigissallu arfinillit aammalu tassa puisi gråsæl. Napittortarineqartut tamarmik maannakkut angalasarnertik pillugu paasissutissanik qaammataasakkut nassiutsiortorput.
Ilisimatusartut nunatsinni siullermeerlutik gråsælinik puiseqartoq siorna paasivaat. Taamanikkut puisi arnaviaq inersimasoq puisilu alla marluk missaanni ukioqassagunartoq assilillugit uppernarsaaserneqarput. Ukioq manna ilisimatusartut taakkorpiaat ataatsimik ukiulimmik piaqqamik uumasumik tigusipput tamatumalu nunatsinni puisit gråsælit ernisarnerat ilimanarsisippaat.
Qasigissat 1960-kkunniilli nunatta sineriaani ikiliartupiluulersimapput nunatsinnilu uumasut nungutaanissaminnut navianartorsiortinneqartut allattorsimaffianni ”ernumanartumik ikiliartortutut” allanneqarput. Nunap Isuata eqqaa qasigissat sinnituannguisa najortarpaat qasigissalluuku angalasarnerat aqqartarnerallu misissuinissami siunertat pingaarnersarigaat, misissuinermilu angusat ilaatigut sumiiffimmi siunissami uuliamik ujaasisoqarsinnaanissaanut avatangiisinik nalilersuinermi atorneqartussaapput.
Puisit gråsælit misissugassanik aaverneqarput, meqquinik ameraasaanillu tigusisoqarpoq. Misiligutit atorlugit gråsælit suminngaanneersuunersut puisillu ilaat nappaammik Europami puiserpassuit ikilissutaannik tunillatsissimanersut paasiniarneqassaput. Ajoraluartumik misiligutissat tammarput. Danmarkimi avatangiisinik misissuiffimmi ilisimatusartut Danmarkimut utileramik pissutsit assigiinngitsut pissutigalugit nammattagaq misiligutissanik imalik tunniuttariaqarsimavaat, tassami isumannaallisaanermik suliaqartut nammattagaq taanna tigummiaannarlugu nassaqqunngimmassuk. Ajoraluartumik ilisimatusartut timmisartumi ilaaffigisaanni ilaasut ilaata Kastrupip mittarfiani nammattagaq misiligutissanik imalik tigusoorsimavaa nammattagarlu nammattakkap tammartup asserluinnaa Pavia Kristiansenimik ilisarnaatilik pisattat ingerlaartarfianut qimassimallugu. Kalaallit Pavia Kristiansenimik atillit 29-iusut paasinarsivoq mannalu tikillugu inuk taanna misiligutissanik tigusisoorsimagunartoq suli nassaarineqanngilaq. Misiligutissat tammartut pillugit Pavia Kristiansen inuilluunniit allat ilisimasaqarunik Aqqalu Rosing Asvidimut, Pinngortitaleriffik, oqarasuaat 00299361247, imaluunniit Rune Dietzimut, oqarasuaat (+45) 2125 4035, Danmarks Miljøundersøgelser, saaffiginnissinnaapput
