Ukiorissaarnerujussua pissutigalugu akitsinni kuussuup Saint Lawrence-p akuani aataat erniorfigisartagaanni puttaat aalersimapput, marsimilu puisit erniulerunik ajornartorsiutigilissavaat.
Qaammatip marsip naalernerani akitsinni aataat sikutani erniulertarput, maannakkulli ajornartoorniarunarput. Puisimmi piaraat nukkannissaminnut puttaamiittarput – ukiormannali puttaaqanngilaq.
Dale Foote, Canadami Avatangiisinut ministereqarfiup oqaaseqartartuata ukiorissaarnera, siornalu siallerujussuaqattaarnerata kingunerigaa nassuiaavoq.
Labrador-ip qanittuani, kuussuullu Saint Lawrence-p akuani sikoqaraluarpormi. Ilisimatuut ilimagaat februaarimi sikooqqilernissaa. Pierre Daoust Atlantic Veterinary College-mi biolog-iusup puisit piaraannut kingunerlutsissasoq ilimagaa. Kuussuarmit Saint Lawrence-miilluunniit puttaanik saatsersoqaraluarpat ima mikitigissapput, puisit qiviuerneqanngitsut nakkaasassasut, sulilu nukittunnginnamik iperassasut. Kingunerisinnaavaa puisit nunami erniornialersinnaanerat, avannamulluunniit illikarnerat. Ukioq manna tasamani puisinniartoqarsinnaanera Daoust-ip ilimaginngilaa, piniartullu toqoraanerannit ukiorissaarnera puisinit toqussutigineqarnerunissaa ilimagalugu. Puisinniarneq marsip naalernerani aallartinneqartarpoq.
”Ilisimavara biolog-it piniartullu silaannaap kissatsikkiartornera alaatsinaatarigaat, kingunerisinnaasaalu arajutsinianngikkaat” Pierre Daoust naggasiivoq.