Puisit nappaalanerat aarleqqutaajunnaarpoq
Qasigissat toqungasut nappasimasullu Sverigep Danmarkillu imartaani qanittukkut siumorneqartut, puisit nappaassuannik nappaalalersimanerat aarleqqutigineqaleraluarpoq, maannali tamanna aarleqqutigineqarsinnaangitsoq, Sverigemi Danmarkimilu immikkut ilisimasallit misissuinerata tamanna takutippaa.
Allattoq Apollo Jeremiassen
maajip 05-at 2014 08:56
Naak puisit napparsimanerannik takussutissaqaraluartoq, puiserpassuit nappaassuarmit eqqugaasinnaanissaat annilaanngassutigineqassanngitsoq, Naalagaaffiup Pinngortitaq pillugu Katersugaasivissuata oqaaseqartitaata oqaatigaa. Katersugaasivissuaq misissuinermi peqataasimavoq.
Puisit nappaassuarmit kingullermik 1989-imi 2002-milu nappaalapput.
Danmarkimi puisit affaasa missaat 2002-mi nappaammit toqquteqarput, maannali amerlasuunngoqqissimallutik. Puisit Vadehavetimiittut 30.000-it missaanniinnissaat, Kattegatimilu 15.000-it missaanniinnissaat ilimagineqarpoq.
