Puisit Canadameersut pisiarineqartassapput
Ukioq manna januaarip arfernat aallarnerfigalugu puisit amiinik Canadameersunik pisiortornerup unitsinneqarallarnissaanik Great Greenland A/S-imut kaammattuinerup atorunnaarsinneqarnissaa Naalakkersuisut tallimanngormat maajip ulluisa 19-ianni aalajangiuppaat.
Qaqortumi ammerivimmi ammit ukiumut naammassisinnaasat ukiuni kingullerni 150.000-inut amerlisimapput tamannalu nunarsuarmi niuernermi unammillersinnaanissamut pisariaqartoq paasinarsisimalluni. Taamaattumik nunatsinni tunisanut ilassutitut Great Greenland A/S pisariaqassappat amminik Canadameersunik pisiortornissamut periarfissaqaqqilertariaqarpoq. Taama nalunaaruteqarpoq Aalisarnermut Piniarnermullu Naalakkersuisoq Finn Karlsen, nangillunilu:
-Puisit amiinik nunatsinni pilersuineq ukiumit ukiumut nikerarsinnaasorujussuuvoq, taamaammallu ukiuni toqqortaasiviit amminik nunatsinneersunik ulikkaarneqarsinnaanngiffiini amminik Canadameersunik Great Greenland A/S atuisinnaasariaqarpoq, Finn Karlsen oqarpoq.
