Piniartunut puisinniartartunut amerlanerusunik aningaasaliinissaq neriorsuutigisinnaanngikkini, aningaasaqarnermut naalakkersuisup Josef Motzfeldtip oqaatigaa. Sermitsiaq internetikkut nittartakkamini taama allappoq.
Aalisarnermut piniarnermullu naalakkersuisoq, Finn Karlsen, Qanoruumut allatut nipilimmik oqaraluarpoq.
Puisit amiinik tunisinermi akigititat piffissami kingullermi 50 procentinik appariarsimapput, taakkununnga tapiissutit 22,5 millioni koruuniusut nungussimammata.
Puisit amiinik pisinermi akit Great Greenlandip siulersuisuinit ukiup sinnerani qaffasitsinniarneqartariaqartut, Finn Karlsenip tallimanngormat Qanoruumut oqaatigaa, taamaaliorsinnaassanngippatalu puisit amiinut tapiissutit naalakkersuisunit eqqunneqaqqittariaqartut oqaatigalugu.
Aalisarnermut piniarnermullu naalakkersuisup Finn Karlsenip, naalakkersuisut avaqqullugit, tusagassiuutinut taamatut oqariartuuteqarluni saqqummernera, aningaasaqarnermut naalakkersuisumit Josef Motzfeldtimit iluarineqarpallaanngilaq, taanna oqarami naalakkersuisuni suli oqaluuserineqarsimanngitsoq, sukumiinerusumillu suli misissuiffigineqarsimanngitsoq.
