Puisit amiinut tapeeqinnermut Demokraatit akuersaanngillat
Puisit amiinut 1,6 million koruuninik tapeeqqittoqarnissaanut Demokraatit akerliupput.
Demokraatit taama akerliunerminnut tunngavigaat Great Greenlandip puisit amerpassuinik toqqortaateqalersimanera tuniniaanermilu pissutsit isigalugit, ukiup sinneranut amernik pisiortornissamut pisariaqartitsinnginnera.
- Demokraatit kissaatigaat erseqqissassallugu piniartut arlaannik patsiseqartumik aningaasarliulersimasut, inuttulli qinnuteqarsinnaammata aningaasatigut ikiorserneqarnissamut, Demokraatit sinnerlugit Inatsisartuni ilaasortaq Lene Knuppel taama allappoq.
Puisit amiinut akimut naalakkersuisut tapiissuteqaqqinerannut atatillugu Demokraatit isumaqarput nutaamik eqqarsartoqartariaqalersoq, soorlu piniartut naammaginartumik inuuniarnikkut atugassaqarnissaat qulakkeerneqartariaqalersoq.
Piniartut akissarsiaqartinneqalernissaat eqqarsaatigisariaqartoq, Demokraatit sinnerlugit Lene Knuppel allappoq.
- Ilinniaqqinnissaannik neqeroorfiginninnikkut inuussutissarsiutillu pissutsinut naleqqussagaalluni ineriartorteqqinneratigut piniartut amerlassusii, piniagassat iluanaarutillu oqimaaqatigiissumik ingerlasinnaappata piniartutut inuussutissarsiorneq ataqqinartumik tunngaveqarluni piussagaluarmat, Demokraatit taama allapput.
Demokraatit aamma isumaqarput puuisit amiinut tapiissuteqaqqinneq pissutsinik piviusunik qimarratiginninniarnerusoq, tapeeqqiinnarnikkut pissutsinik atasinnaasunik iluarsiinissamut kinguarsaanerusoq.
