Puisit amiinik tunisassiorneq innarlerneqarsinnaavoq
Europaparlamentimi ilaasortat, puisit amiinik Canadameersunik tunisassiornermik akerliullutik atsioqattaarnerat, Kalaallit Nunaata puisit amiinik tunisassiorneranut ajoqusiisinnaasoq, Josef Motzfeldt oqarpoq. Socialdemokratineersullu Dan Jørgensen-ip Europaparlamentimi atsiortitsisaqattaarnera, ilisimasaqannginnermik pissuteqartutut Aningaasanut Nunanullu allanut Naalakkersuisup Josef Motzfeldt-ip nalilerpaa.
- Puisit amii pillugit ilisimasaqanngilluinnarluni, Dan Jørgensen-ip atsiortitsisaqattaarnini ingerlatiinnassappagu, naalagaaffeqatigiinnermi suleqatigiinneq, aammalu nalakkersuinikkut toqqammaveqarluni oqallinneq sequmittussaavaa akornuserujussuaannanngikkuniuk. Canadami nunatsinnilu puisit 8 millionit pillugit suliniutit Dan Jørgensen-ip, Socialdemokratineersup ilisimasaqarfiginagit atsiortitsisaqattaarpoq, allaat NAMMCO-mit oqariartuutigineqartut akerlilersorlugit, silaannarmiit tigooralluni, nunatsinni piniarnermik inuussutissarsiuteqartut, allamik periarfissaqanngitsut, suli 80-ikkunninngaanniit ajornerusumik innarlerneqassapput, Josef Motzfeldt oqarpoq.
Socialdemokratit siulittaasuat qanittumi nunatsinnut tikeraarpoq, taannalu ilaasortanut nassuiaasariaqartoq naalakkersuisoq Josef Motzfeldt isumaqarpoq.
- Naalagaqarnatik piumasaannarminik ingerlalissappata naalakkersuinikkut oqallinneq sumorujussuaq ingerlasinnaavoq.
Josef Motzfeldt aamma neriuppoq, Dan Jørgensen-imut allakkat europa parlamentimut anngunneqassasut, oqallinnerlu toqqammavigissaarnerusoq anguneqarsinnaassasoq neriuutigaa.
