Puisit amiinik sanalukkanillu nioqquteqartarneq inerteqqutaalissaaq
Uumasunik illersuiniaqatigiiffiit, inuit tusagassiutini ilisimaneqarluartut, nunallu puisinniarfiunngitsut puisinniarnermut akerliunerat naggataagut ima annertutigilerpoq, puisinik puisinillu sanalukkat nioqqutigineqarnissaasa aappaagu upernaakkumiit inerteqqutaalernissaat EU-mi ministerit akuersissutigisariaqalersimavaat, soorlu assersuutigalugu puisit amiinit aaqqatilianik pisinissaq ajornakusoortorujussuanngussaaq.
Naggueqatigiit Inuit immikkut aaqqiivigineqaraluartut, Kalaallit Nunaata ernummatigaa, kalaallit puisinit sanalugaannik nioqquteqartarnerat, piniartorpassuillu inuussutissarsiornerat, ajoquserneqarujussuassasoq kiisalu Kalaallit Nunaanni aningaasaqarniarneq assorsuaq eqqugaassasoq.
Danmark Rumænialu kisimik siunnersuummut taaseqataanngillat.
Nunat puiseqarfissuit EU-mut ilaasortaanngitsut, soorlu Norgep minnerunngitsumillu Canadap, EU ingasattajaarnerarlugu isornartorsiorpaat. Canadamiullu isumaqarput, inerteqquteqalerneq Nunat tamalaat niueqatigiinnikkut suleqatigiiffiata, WTO-p, nunarsuaq tamakkerlugu niuernikkut isumaqatigiissutaanik unioqqutitsinerusoq. Taamaammat niueqatigiinnikkut suleqatigiiffimmi oqallinnissaq ilimanarsilluinnarpoq.
