Puisit amiinik pisisarunnaarneq pillaaniarnerunngilaq

Canada Kalaallit Nunaannut puisit amiinik tunisisarsimasoq, illuatungaani Kalaallit Nunaata Canadamut niuerniartarnera ajornarsimavoq. Puisit amiinik Canadamiit pisisarunnaarneq pillaaniarnerunani, Kalaallit Nunaata imminut pilersorsinnaanera pissutaasoq, Aalisarnermut Piniarnermullu Naalakkersuisoq Finn Karlsen oqarpoq.

- Piniartortatta pisarisinnaasai naammattut pisiarisinnaaleratsigit puisit amii Canadaminngaanneersut pisiarisarunnaarpagut. Aamma illuatungaani niuerneq ingerlanneqartoq tassatuaavoq Nunatta Canadamiit puisit amiinik pisisarnera. Nioqqutissat nunatsinneersut Canadamut eqqussinnaaneri ajornakusoorpoq, allaat umimmaap amia, kalaallilluunniit eqqumiitsuliaat Canada-mut eqqunneqarsinnaaneri ajornakusoorpoq. Ilaatigut allaat kilisaataatigut Canadamut tulaqqusaaneq ajorpulluunniit, pillaaniarnerunngikkaluarpoq, suleqatigerusukkaluaqaagulli imaanngilaq aamma akiniaasugut. Kalaallit Nunaata Canada-miit puisit amiinik pisisarunnaarnera Canadami piniartunut innarliisinnaanera Nunatsinnut tutsinniarneqassappat tupigissavara.

Taama oqarpoq Aalisarnermut piniarnermullu naalakkersuisoq Finn Karlsen.