Naalakkersuisut puisit amiinik Canadamit eqqussueqqusiunnaarnerat Canadami ajuusaarutigineqarpoq. Danmarkimi Canadap aallartitaata neriuutiginngilaa aalajangerneq qaqugorsuarmut atuutissasoq, aallartitammi paatsooqatigiinnikkut pilersimanerarpaa.
Great Greenlandip puisit amiinik Canadamit pisiumajunnaarnera ajuusaarutigaara, Namminersornerullutilli Oqartussat namminneerlutik aalajangigaraat, Danmark-imi Canadap aallartitaa Fredericka Gregory oqarpoq, Canadallu akuerinerarpaa suliffeqarfiit namminneq sumit amersinissartik aalajangissammassuk. Canadamiulli aalajangernerup allanngortinnissaa neriuutigaat.
Puisinniarnermi periuserineqartartut misissorneqareerpata Great Greenland-ip aalajangernini allanngortissinnaassagaa, Fredericka Gregory neriuppoq. Oqaatigaalu Canadap sineriaani puisinniartarneq akuerineqarsinnaasumik ingerlanneqartoq. Tamanna Canada-mi naalakkersuisunit nakkutigineqarpoq.
Pinngortitamik illersuiniaqatigiit TV-kkut takutittagaat kinaassusersiornertaqartaqisut oqaatigaa, namminermi Canadap sineriaani puisinniarnerup qanoq ingerlasarnera takunikuunerapaa.
Anaalerlugit puisinik toqoraaneq akuersaarnartippaa, puisimmi naalliutsinneqarneq ajormata. Nunani allani uumasunik toqoraasarnernit uumasunik asattuussinerunerooq.