Puisit amiinik EU-p mattussiniarnera kuturitsinnut navianartorsiortitsissaaq

Puisit amiisa eqqunneqarsinnaanerannut inerteqquteqarneq Ruth Heilmannip Nunat Avannarliit Killiit Siunnersuisoqatigiivini qullersaasunut ilaasortatut eqqarsaatigeqqeqquvaa.
Allattoq Jaaku Lyberth
februaarip 25-at 2009 06:42

Ruth Heilmannip oqaatigaa puisit amiinik nioqquteqarnerput aammaarluni ajalusooqqajaalersoq.

- Tamanna alianaqaaq, naggueqatigiinnilu Inunni ilaqutariit amerlasuut siunissartik siooragaat. Tamanna sumut iluaqutaassagami?, Europaparlamentimi ataatsimiititaliaq, SIN-EEA, Ruth Heilmannip ippassaq naapikkamiuk aperaaq. Puisit amiinik eqqussinissamik EF-ip 1983-imi inerteqquteqarneratulli sakkortutigisumik Nunatta maanna eqqugaanissaa Ruth Heilmannip ernummatigaa.

- Naak naggueqatigiit Inuit eqqusseqqusinnginnermut ilaatinneqanngikkaluartut Kalaallit Nunaat atugarliortinneqartorujussuuvoq. Puisit amiinik niuffaffik ajutoorpoq, natserillu amiisa akii malunnaatilimmik appariaateqarput, naak eqqussinissamut inerteqquteqarnermi aataat aamma natsersuit amii kisimik pineqaraluartut. Nunaqarfinni isorliunerusuni ilaqutariit naggueqatigiinni Inunneersut taartaasinnaasunik inuussutissarsiornikkut periarfissaqanngitsut inuuniarnikkut aningaasarsiornikkullu eqqugaanerat kingunerlutsitsisorujussuuvoq, Ruth Heilmann oqarpoq.

Ilutigaluguli erseqqissaatigaa inerteqquteqalerneq issittumi inuiaqatigiinnut ikittunnguanut eqqoruminaqisunullu aningaasarsiornikkut taamaallaat eqquissanngimmat.

- Aammattaarli kulturitsinnut kinaassutsitsinnullu navianartorsiortitsisussaavoq, Ruth Heilmann tikkuaavoq.