Puisit amiinik EU-mut eqqusseqqusiunnaarnissaq Canadamit unitsinniarneqalerpoq
Puisit amiinik EU-mut eqqusseqqusiunnaarnissaq pinngitsoortinniarlugu nunat tamat niueqatiginnikkut suleqatigiiffiata WTO-p paasiniaavigineqarnissaa, Canadami naalakkersuisunit kissaatigineqarpoq.
Taama piumasaqaateqarneq EU-p Canadallu akornanni isumaqatigiissitsiniarluni misiliinerit siullersaraat.
- Canadami puisinniartartut Canadami oqartussaasunit pisortatigoortumik maanna tapersersorneqalerput, nunanik allanik niueqateqarnermut ministeri oqarpoq, nangillunilu:
- Puisit amiisa EU-mut eqquteqqusaajunnaarnerat EU-p niueqateqarnermut inatsisaannik unioqqutitsineruvoq. Canadamiut puisinniartarnerat inatsisit najoqqutaralugit pisarpoq, puisillu amiinik EU-mut eqqusseqqusiunnaarnissamik siunnersuut ilisimatuussutsikkut paasisanik tunngaveqanngilaq, Stockwell Day oqarpoq.
Canadami aalisarnermut ministeri Gail Shea tusagassiuutinut aamma oqaaseqarpoq. Canadami puisinniartarneq nungusaataanngitsumik tunngaveqarluni pisartoq Gail Shea oqarpoq, puisillu pissusissamisoortumik piniarneqartarnerat aamma oqaatigalugu.
- Uumasunik illersuiniaqatigiiffiit kukkusunik tunngaveqartunik saqqummertarput, tamannalu erseqqissaatigiuassavarput, puisinniartartullu illersortuassavavut, aalisarnermut ministeri oqarpoq.
Ministerit taakku marluk naggueqatigiit Inuit suliniaqatigiiffiannit Inuit Tapiriit Kanatamit tapersersorneqarput.