Puisit amiinik EU-mut eqqusseqqusiunnaarneq Kalaallit Nunaannut periarfissatsialaasinnaavoq
Naggueqatigiilli Inuit siunnersuummut ilaatinneqanngikkaluartut tamatuma qanoq aqunneqarnissaa suli nalunarallarpoq:
- Suliaq ukiaru aallarnerneqassaaq, ilisarnaasiiisarnerit ullumikkut qanoq aqunneqarnersut siunnersortip misissussammagu. Nunani tamalaani ilisarnaasiisarnerit misissorneqassapput, Kalaallit Nunaanneersunik ilisarnaasiisarnerit misissorneqassallutik, Lida Skifte Lennert Radioaviisimut oqarpoq.
Siunnersortimik atorfinitsitseqqaartoqartariaqassaaq, nalunaarusiortoqassallunilu, ilisarnaatillu ilusissaa tassuunatigut siunnersuutigineqassalluni.
Naggueqatigiit Inuit siunnersuummut ataasinngormat akuerineqartumut ilaatinneqanngillat, tamannalu siunissaq eqqarsaatigalugu Nunatsinnut iluaqutaaratarsinnaasoq, Lida Skifte Lennertip oqaatigaa, EU-mullu nioqqutissiorsinnaanissaq pillugu suliniuteqartuarsimanertik tikkuarlugu.
- Puisit amiinik sanalukkanillu puisinit sanaanik nunani EU-mut ilaasortaasuni avammut nioqqutissiornerup inerteqqutaalernissaa pillugu siunnersuuteqalersaartoqartorli Kalaallit Nunaata EU-mut nioqqutissiorsinnaanissaa pillugu suliniuteqartuarsimavugut. Siunnersuut saqqummiunneqaqqaarmat kikkunnut tamanut inerteqqutaalernissaa siunniunneqaraluarpoq, naggueqatigiilli Inuit inerteqqussummi ilaatinneqannginnissaat kingorna siunniunneqarluni. Taamaammat naggueqatigiit Inuit maanna periarfissagissaarnerulersinnaassapput, tamannalu atorluartariaqarparput, Lida Skifte Lennert oqarpoq.
