ICC-ip siulittaasua Aqqaluk lynge isumaqarpoq puisit amiinik nunatsinnut eqqusseqqusinnginnermik aalajangerneq ukiorpassuarni nunat inoqqaavisa uumassusilinnik inuussuteqarnerannik akuerineqarsinnaanerannut ilungersuuteqarsimamanermut ajoqutaasinnaasoq:
- Nunarput amernik avammut tunisisinnaatitaanerminut mattusimaneqarpoq, taamaattumik ICC-mi, Namminersorerullutik Oqartussat kiisalu NAMCO aqqutigaklugu ukiorpassuit suliarsimavugut puisit amiinik tuniniaanerup aammalu nunap inoqqaavisa uumassusilinnik inuussuteqarnerat akuersaarneqarnissa anguniarlugu, taamaattumik isumaqarpunga mianersuunneqartariaqartoq amernik eqqusseqqusaannginnermik oqaaseqarneq; tassami illuatungaatigut aamma immitsinnut aaginnarsinnavugut, Aqqaluk Lynge oqarpoq.
- Aqqaluk Lynge isumaqarpoq mattusimaneqarneq ammarniartillugu Naalakkersuisut nunat avannarlernik pisoq pillugu isumasiortariqarai.
Aqqaluk Lynge oqarpoq New Foundlandi-mi puisinik avaartaaserluni toqoraasarneq tamatsinnut tupannartutut misinnaraluartoq, uumasunik illersuiniaqatigiiffiit sunniinerisa puisit amiinik nunanit allanit eqqussuisinnaatitaanitsinnik innarliinissaq mianersuuttariaqartoq:
- Ilisimareerparput akeqqavut qanoq annertutigisumik sakkussaqartigisut, taamaattumik illuatungiliiniarneq ajornakusoortorujussuuvoq, Naalakkersuisulli amminik mattussinerannik paasilluarsinnavakka, kisianni nunanit allaninngaanniit amminik eqqussuisinnaaneq innarlerneqarsinnaanera mianersuunneqartariaqarpoq.
-Avataaninngaanniit saassunneqartilluta tassanngaannaq iliuusissanik pinaveersaartariaqarpugut, nalunnginnatsigik suna tamaat sakkugalugu qanoq iliuuseqarsinnaasut.
Aqqaluk Lynge-p erseqqissaatigaa ICC-p piniartut illersorlugit aallaaveqarmat:
- ICC-minngaaniit neriorsuutigissavarput piniartut inuiaqativullu illersorlugit aallaaveqaratta, Aqqaluk Lynge naggasiivoq.