Puisit amii tunisaaqqilerput
Tamanna tunisisarnissamik isumaqatigiissummi nutaami ammeriviup Great Greenlandip KNAPK-llu ullumi isumaqatigiissutaannit paasinarsivoq.
Isumaqatigiissut natsiit aataallu amiisa 61.000-it tunineqarsinnaalernerannik kinguneqassaaq.
Tamatumunnga peqatigitillugu pisasseeriaaseq nutaaq atulersinneqassaaq, taassumalu kingunerissallugu puisit amii kvartalimut qanoq amerlatigisut tunineqarsinnaanerisa killilerneqarnerat.
Pisassiissutit nunguppata tunioraaneq erniinnarluinnaq unitsinneqassasoq isumaqatigiissummi nutaami takuneqarsinanavoq.
Isumaqatigiissummi pingaarnerup aappa tassa, natsiit aataallu amiinik tunisinermi akigitinneqartoq amermut ataatsimut 250 kr.-inut apparneqassammat. Akit appartinneqarnerat ullumikkut atuutilereerpoq.
Aammattaaq Kujataani - tassalu Nanortalimmiit Sisimiut ilanngullugit - apriilimi maajimilu tunioraanerup unitsinneqarnissaa aalajangiunneqarpoq. Avannaani Tunumilu maajimi tunioraaneq unitsinneqassaaq. Tamanna puisit tamatumani mamaartarnerannik pissuteqarpoq.
