Inuussutissarsiutit

Puisit amii tunisaallualersut

Kopenhagen Furip puisit amiinik Great Greenlandimeersunik tunisartagai amerliartoqqilerput. Puisit amiinik tunisat arriitsumik amerliartortut akitsorterussisarfiup maluginiarsimavaa.

Allattoq Camilla Dam

januaarip 14-at 2015 12:33

Nutserisoq Simon Uldum -

- Pisiortortartut aalajangersimasut amerliartornerisigut takusinnaavarput atuisartut taamatullu pisisartut puisit amiinik ariitsunnguamik piumasaqarneruleriartortut, Kasper Scott Reinbacher, Kopenhagen Furimi akitsorterussisartoq taama oqarpoq.

Puisit amiinik nittarsaassineq akitsorterussisarfiup annertuumik sulissutigisimavaa, tamannalu maanna iluatsilersutut isikkoqarpoq.

Aamma atuaruk Puisit amiinik tunisassiat nutaat

- Akitsorterussisarfimmi soqutiginninnerup annertunerulerneranut pissutaasut ilagaat, puisit amiinik nittarsaassinermi piujuaannartitsinissamik tunngaveqarluni ingerlatsisoqarnera oqaluttuarineqartarmat aammalu nioqqutissaq pitsaasuullunilu immikkuullarissuummat. Taamatullu oqaluttuarineqartarnera atuisut amerliartuinnartut paasiartulerpaat, Kasper Scott Reinbacher oqarpoq.

Aamma atuaruk Great Greenland puisit amiinik tuniniaanerusalernissaminut isumaqatigiissuteqarpoq

Puisit amii katillugit 21.485-it sisamanngormat akitsorterunneqarput, natsit amii 14.379-it aataallu amii 7.106-it. Amiillu misunneqanngitsut soqutigineqarnerusimapput.

Aataap amianut akigitinneqartoq agguatigiissillugu 360 koruuniuvoq, akisunerpaaq 820 koruunilerneqarsimalluni. Natsiup amianut akigitinneqartoq agguaqatigiissillugu 248 koruuniuvoq, akisunerpaarlu 380 koruunilerneqarsimalluni.