Puisit amii pisuunit pilerigineqarluarput
Puisit amiinik tuniniaaneq nunarsuarmi ingerlalluarpoq. Kineserit russillu pisuut puisit amerpassuinik pisisarput, amiilu akitsoriartuinnarlutik. Tamannalu pivoq upernaarmanna puisinik piniarneq akerliuffigineqaleruttoraluartoq.
Brigitte Bardot-p puisit akissarsiutigalugit piniarneqartarnerat Canadami tusagassiortunik katersuutsitsinermi qissatigaa, Beatles-inilu nipilersortartuusimasoq Paul McCartney puisit piniarneqartarnerannut sakkortuumik akerliulluni isummaminik saqqummersitsisarluni. Akerliunerilli puisit amiinik tuniniaanermut sunniuteqanngitsut, Great Greenlandimi pisortaq Michael Nielsen oqarpoq.
-Massakkut puisit amiinik tuniniaaneq ingerlalluartorujussuuvoq, piniartorpassuaqartarpoq akillu qaffakkiartuinnarlutik, Michael Nielsen oqarpoq.
Ruslandimut Kina-mullu tunisinerit ingerlalluarnerpaapput. Canadamili ammit pillugit oqallinnerup kinguneraa Europami nunat ilaasa puisit amiinik nunaminnut eqqussineq unitsinniarsarimmassuk, tamakkununnga ilaallutik Belgia, Italia Tuluit Nunaallu.
-Tamanna pingaartittorujussuuvarput. Annertuumik tunisiffigineq ajoraluarlutigit, tunisassianut allanut sunniuteqarsinnaanerat eqqarsaatigalugu, Great Greenlandimi pisortaq Michael Nielsen oqarpoq.
