Puisit amii piniarnermut atortussaqqissuupput
Puisip amii atorlugit piniarnermut atortussanik sananissamut takorluugaqaraanni, periarfissatsialassuaq maanna takkuppoq. Kattuffiit, suliffeqarfiit Kommunelu ataatsimoorlutik, maanna ullunik sisamanik sivisussuseqartumik Tasiilami innuttaasunut pikkorissartitsinialerput.
Siunissami puisip amiinik piniarnermut atortunik sanaartorsinnaalernissaq anguniarlugu, pikkorissartitsineq ingerlanneqalerpoq. Taamaattumillu maanna, ullunik sisamanik sivisussusilimmik pikkorissartitsinissamut, inuit piumassusillik qulit ujartorneqalerput.
- Puisip amii atorlugit siunissami piniarnermut atortussanik sanaartorsinnaalernissaq takorluugaralutigu pikkorissartitsinialerpugut. Pikkorissarneq marlunngornermi novemberip 29-ani aallartissaaq, tallimanngornermilu decembarip aappaanni naammassissalluni, Poul Ignatiussen Sørensen Destination East Greenlandimiit knr.gl-mut taama oqarpoq.
Pikkorissarneq ullunik sisamanik sivisussusilik akeqanngitsumik ingerlanneqassaaq, peqataasussalli ullormusiaqartinneqassanngillat. Illuatungaatigulli pikkorissarnermi atortussat akeqanngillat. Poul Ignatiussen Sørensenillu oqaatigaa, pikkorissartitsinissamut taamaallaat inuit qulit inissaqartut, siunissamilu ammerinerup ingerlatiinnarnissaannut piumassuseqartut kisiisa pikkorissarnissamut peqataatinneqarumaartut.
- Mersorfissatut ini atorneqartussaq. Taamaattumik siunissami amminik suliaqarusuttut pikkorissarnissamut toqqarniarpavut, Poul Ignatiussen Sørensen oqarpoq.
Pikkorissarneq illoqarfiup mersortarfiutaani ingerlanneqassaaq, tassanilu sulisut tallimat peqataanissaat qulakkeerneqareeerpoq. Maannamullu illoqarfimmiit saaffiginnittoqallattaalereersimavoq. Pikkorissarnissamut peqataanissamut nalunaarfissaq kingulleq, tallimanngorneq novemberip 18-nut killiliunneqarsimavoq.
