Puisit amii pillugit paasititsiniaalerput

Issittoq pillugu aallartitaq paasititsiniaanissamik suliniuteqalerpoq Great Greenland EU-mi inissisimalluarneruleqqullugu.

EU-p puisit amiinik eqqusseqqusiunnaarnera Nunatta Ammerivianut ajoqutaaqaaq. Tassami ammit tunineqartartut 70 procentii, europamiunit siornatigut pisiarineqartaraluarput, ullumikkullu 10 procentiinnaat pisiarisarpaat. Tamatuma kinguneranik Nunatta Ammeriviani amerpassuit qaleriiaatiinnaleqqapput. Issittulli aallartitartaava Klavs A. Holm ulappusereerpoq, Nunattalu Ammeriviata EU-mut tunisaqarneruleqqinnissaa anguniarlugu paasisitsiniaaneq aallarnisarlugu.

- Tunisassianik puisineersunik eqqusseqqusiunnaarnermik oqartussaasut inatsimmik timitaliiniartussat kalaallit puisinit tunisassiaasa pineqannginnerat ilumut paasisimaneraat uanga kommissionilu qulakkeeqqaassavarput, Klavs A. Holm oqarpoq.

Tamatuma saniatigut annertuukkaarlugit pisiortortartut, niuertarfiit atuisartullu tunisassiat tamakku ilumut pisiarineqarsinnaallutillu eqqussuunneqarsinnaasut paasitinniarneqarnissaat pisariaqassaaq, tassami inerteqqutaanngilaq piujuaannartitsinissamullu isummamut uniuuttuunani.

- Nunanut allanut tunngasunut ministerip suliamut uunga tunngatillugu kalaallit soorunami ikiorusuppai, aamma suliniutit akisuallaartariaqanngillat, tassami aallartitavut aqqutigalugit Europami oqartussaasut suliniaqatigiiffiillu oqaloqatigineqarsinnaapput, Klavs A. Holm oqarpoq.

Oqaatsillumi Great Greenlandmi tusarluaqaat

- Tusagaq nuanneqaaq, tassami taama annertutigisumik paasititsiniaanissaq akisuallaaqaaq, uagullu taamaasiornissamut saperluinnarluta, Great Greenlandimi pisortaq Lars Berg taama oqarpoq.

Qallunaalli nunanut allanut ministereqarfiata EU-lu tunisassianik ussassaarissanngitsut Klavs Holmip naqissuserpaa

- Tunisassianik puisineersunik tunisisassiortut pisisartunut assigiinngitsunut attaveqarlernissaat aallartitaqarfitta akuuffigisinnaavaat, Klavs A. Holm oqarpoq.

Tunisassianilli puisineersunit eqqusseqqusiunnaarnerup atorunnaarsinneqarnissaa Klavs A. Holmip piviusorsiortuusorinngilaa.

- Apeqqut taanna piviusorsiortumik ilusilersortariaqassaaq, peqqussummi nutaajuvoq, isumaqatigiinniarnerillu taassuma tungaanut ilungersunarsimallutik. Tassami nunat 27-t akornanni 26-t peqqussummut akuersimmata piviusorsiortuusariaqassaagut. Kommissionimimi allannguutissamut siunnersuummik imaaliallaannaq pilersitsoqarnavianngilaq, piffissarlu sivisooq atorneqaqqaartariaqassalluni, Klavs A. Holm oqarpoq.

Nunatta Ammeriviata aningaasat kaaviiaartitai ukiuni kingullerni appariartupiloorsimapput. Ammerivik ingerlalluarallarami ukiumut 70 millionit koruunit isertittarpai, ullumikkulli 10 millionit koruunit ataallugit isertinneqartalerlutik. Ammit 300.000-it Nunatta Ammeriviata Danmarkimi Nunatsinnilu toqqorsiviini maanna qaleriiaatiinnaqqapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat