Puisit amii pillugit ICC-mit Naalagaaffiit Peqatigiit saaffigineqarput
Inuit Issittormiut Siunnersuisoqatigiiffianni siuttut marluk, tassa Akilinermiu Duane Smith Nunatsinneersorlu Aqqaluk Lynge Nunat Inoqqaavisa FN-imi New Yorkimi ulluni makkunani ataatsimeersuarneranni saaffiginnissuteqarput.
Issittumi nunaqartut atugaat pillugit ullup affaani ippassaq oqallittoqarpoq. Oqallinnermilu tassani puisinut tunngasut oqallisaangaatsiarput.
Nunat inoqqaavisa aallartitaat naggueqatigiit Inuit uumasunik nungutaanissamik ulorianartorsiortinneqanngitsunik piniarsinnaanerat niuersinnaatitaanerallu illersorlugit oqaaseqarput. Taamalu EU-p puisit amiinik nioqquteqarnermik inerteqquteqarniarnera, nunat inoqqaavisa pisinnaatitaaffiinik saassussinerunerarlugu.
Tamanna tunngavigalugu Inuit Siunnersuisoqatigiiffianni siuttut marluk, Naalagaaffiit Peqatigiit ataatsimiititaliaanut, Permanent Forumimut saaffiginnissuteqarput, puisit amiinik nioqquteqarneq pillugu apeqqummi naggueqatigiit Inuit illersorneqarnissaat anguniarlugu.
- Apeqqummi uani nukiit imaannaanngitsut illuatungeralutigit nalunngilarput. Taamaattorli aamma ilisimavarput nunat inoqqaavi nunarsuarmi sumi tamaneersut ataqatigiillutik illersoqatigiikkaangata ajunngitsumik naammassisaqarnissamut neriuutissaqalersarluta, Aqqaluk Lynge New Yorkimiit taama oqarpoq.
Nunat Inoqqaavisa ukiumoortumik ataatsimeersuarnerat ataasinngormat ammarnersiorneqarmat, tuusintinit sinnilinnit, inuiaassutsiminnik ilisarnaatiminnik assuutiminnik alutornaqisunik qalipaatigissaaqisunillu atisalersorsimasunit peqataaffigineqarpoq.
