Puisit amii pillugit EU-mi aalajangiinissaq kinguartinneqarpoq
Puisit pisataannit sanaartukkanik EU-p eqqussueqqusinnginnera oqallisaaqisoq kinguaattooqippoq. Canadian Press taama allaaserinnippoq.
Marlunngormat taasissutigineqartussaagaluarpoq, aalajangiinissarli siusinnerpaamik maajip aallartilaarnerani aatsaat pissagunarpoq.
Allattoq Mads Lynge
apriilip 02-at 2009 05:50
Canadap EU-mut aallartitaasa oqaaseqartartuat, Roy Christensen, taama ilisimatitsivoq.
Eqqusseqqusinnginnermi Canadami naggueqatigiit Inuit kalaallillu ilaatinneqanngikkaluartut, eqqussueqqusinnginnermi malittarisassat sukaterneqarnissaat nunat taakku marluk, tassa Canadap Kalaallit Nunaatalu, pinngitsoortinniarsaraat.
Taasisitsinissap maajip qaammataanut kinguartinneqarnerani nunat 27-t EU-mut ilaasortat sunnerniarnissaannut Canada Kalaallit Nunaallu periarfissaqalerput.
EU-mili inatsisartunut juunip ulluisa arfineq-aappaanni qinersisoqartussaammat suliassaq suli ajornakusuussaqaaq, EU-mimi inatsisartuni ilaasortarpassuit puisit pillugit apeqqut qineqqusaarutigaat, Europami uumasunik illersuiniaqatigiiffinnut qujageqqusaarlutik.
