Puisit amii pillugit Canadap Norgellu iliuusissaat nunatsinnit utaqqimaarneqarput

Canadap Norgellu qanoq iliuuseqarnissaat, Nunatsinni naalakkersuisut utaqqimaarniarpaat.

- Canadap naalakkersuisuisa aamma Norgep massakkut ilannguttup nunarsuaq tamakkerlugu niuernikkut suliniaqatigiiffissuup, WTO-p, malittarisassaanik EU unioqqutitsinerarlugu naammagittaalliuteqarniarnerat qanoq piumaarnersoq malinnaaffigaarput. Apeqqutaavorlu Nunatsinniit qanoq ililluni tamanna peqataaffigisinnaaneripput, Kuupik Kleist oqarpoq,

Aamma naggueqatigiit inuit immikkut pineqarnissaat qanoq atorluarneqarsinnaanersoq, Nunatsinniit Danmarkimiillu misissorneqarpoq, Naalakkersuisullu siulittaasuata suliat taakkua peqataaffigai.

Tassalu Naalakkersuisut siulimik anguniarsimasaata allanngortinniarnissaa Kuupik Kleistip takorluunngilaa, soorlu EU-p puisinut tunngasumik aalajangiinerata aallaqqaataaniit suliareqqinneqarnissaa takorluunngikkaa.

Kisianni kattuffiit naalakkersuisunut attuumassuteqanngitsut eqqartuussivilersuussiniarnerat, nunatta tatiginassusaanut kalluaassanngitsoq, Kuupik Kleistip ilimagaa:

- ICC-p KNAPK-llu toqqammaviat sunarpiaanersoq aammalu kikkut eqqartuussivimmut sorlermut tunniunniarneraat suli oqaloqatigiissutiginngilarput. Naatsorsuutigaarali kattuffiit oqaloqatigillattaarneranni taakkua paasiumaarlutigit.

- Kattuffiit taamaattut naalakkersuisunit aningaasatigut tapersersorneqaraluarunilluunnit, kiffaanngissuseqarnerat ataqqineqartussaavoq. Taamaattumik uanga naatsorsuutiginngilara, tatiginassutsimik apeqqusiisoqassasoq. Kisianni immaqa tatiginassutsimik apeqqusiisoqarsinnaavoq, naalakkersuisuusimasut suliniutigisimasaat anguneqartoq, uagut maanna naalakkersuisuusut eqqartuussivilersuussissutigissagutsigu, Kuupik Kleist oqarpoq.