Puisit amii pillugit ataatsimeeqatigiinneq

Kalaallit sinnerlugit ICC-mi præsidentip Aqqaluk Lyngep puisit amiisa avammut tunisaanerat pillugu naalakkersuisut aalisartut piniartullu kattuffiat KNAPK ataatsimeeqatiseralugit qaaqquai.

Naalakkersuisut sisamat qaaqqusissummut akuersaarput, taamatuttaaq KNAPK-p siulittaasua Peter Olsen akuersaarluni.

Ataatsimiinnermi puisinniarnermut tunngasut nunanut tamalaanut isumaqatigiissutinut naleqqiullugit qanoq ililluni kalaallit soqutigisaat qulakkeerneqarsinnaanersut oqaluuserineqassapput, kiisalu avammut ataatsimut kiinnernissaq qanoq qulakkeerneqarsinnaanersoq aamma oqaluuserineqassalluni.

Ataatsimiittussalli puisit amiinut tunngatillugu isumaqatigiissinnaassanersut qulakkeerneqarsinnaanngilaq. Nunatsinnimi aalisartut piniartullu naalakkersuisut Canadamut puisit amiinik pisiumajunnaarnermik aalajangernerat tapersersorpaat. Akerlianik ICC-p unioqqutitsinertut tamanna isigalugu.

Taamatuttaaq naalakkersuisut akunnerminni canadamut puisit amiinik nunarput pisisassanersoq pisisassannginnersorluunniit oqallissutigalugu.

Ataatsimiinnissaq ullumikkut ullaap tungaani aqqanernut Nuummi aallartissaaq.