Puisit amii nunatsinneersut eqqarneqartarsimapput
Great Greenland puisit amiinik nunatsinneersunik tusindtilinnik arlaqartunik, eqqaasarsimavoq. Tamanna piniartunut inuiaqatigiinullu eqqunngitsuliorneruvoq imaannaanngitsoq, taama oqarpoq Narsami namminersorluni amminik tigooqqaaviutilik, Ole Jørgen Davidsen. Taanna isumaqarpoq nunatsinni puisit amii tunisaasartut ikippallaarnerarlugit, Great Greenlandip Canadamut pisiniartariaqartarsimaneranik ammerivimmik ingerlatsisut oqalunnerat tunngavissaqanngitsoq.
- Nalaatsornerinnakkut ameerniarlunga Qaqortumiillunga eqqaavissuarmut kammalaatinga ornillugu, pinialerpara amerparparpassuit eqqarneqarsimasut. Taava allatut ajornartumik filmiliutersiniariarlunga filmiliortariaqalersimallugit taakku amerpassuit. Isiginnaaqqaarpakka qanoq kusanartigisut, tamaallaat tippatsiinnarnikut, Canadarmiut amiutaasa salliutinneqarnerat pissutigalugu.
Oktobarip tallimaani , 21-ianni taavalu 26-ianni eqqakkanik filmiliorsimavoq.
- Amerparparpassuit kalaallit piniartut pisaat eqqaavissuarmut eqqakkat takorlooruminaatseqalugit filmiliarinikuuakka, taakkua.
Taama videoliuummut immiussisimanini Ole Jørgen Davidsen-ip ima tunngaveqartippaa:
- Taamanikkulli ammip pitsaassusaa anguniarlugu piniartut suleqatigalugit sorsunnikuuvunga, taavalu angusarput pitsaasoq angunikuullutigu, 3 procentit sinnilaaginnarlugit ammit tigusagut ajortortaqartalernikuullutik. Pitsanngortitsigatta illuatungaani Ammeriviup taama eqqaavissuarmut eqqaanera akuersaarneqarsinnaanngimmat filmiliorpunga.
- Uanga nammineq isikka atorlugit puisit amii Canadameersut isiginnaartarnikuuakka, aammalu assilinikuullugit.
Ole Jørgen Davidsen-ip Great Greenlandip pisortaata Michael Nielsen-ip Canadami puisit avaartakkat amiinik pisiaqarsimanatik oqarnera akerlilerpaa:
- Uanga nammineq isikka atorlugit isiginnartarnikuuakka Canadarmiut amiutaat tamaavimmik ikeqanngitsut, aallaallugit toqunneqarsimanngillat nissinnerlunneqarsimaneri eqqaassanngikkaanni allamik putoqanngitsut.
Piffissami aalajngersimalluinnartumi toqorarnikut meqquisa tamavimmik assigiinnerat peqqutigalugu.
Qanoruumi Great Greenlandip siulersuisuisa siulittaasua Anders Brøns oqarpoq nunatsinni ameerutit naammattanngimmata Ammerivik Canadamut pisiniartariaqartarsimasoq. Tamanna Ole Jørgen Davidsen-ip ilumuunnginnerarpaa:
-Uanga nammineq Ammerivimmut oqarasuaatikkut paasiniaanera naapertorlugu paasinikuuara siorna oktobarimi ammit 6000-it missaat eqqarneqarsimasut.
Narsami namminersorluni amminik tigooqqaaviutini Great Greenlandimik suleqateqarluni ingerlappaa.
Ole Jørgen Davidsen-ip saqqummiussaanut Great Greenlandip pisortaa Michael Nielsen kiisalu Great Greenlandimi siulersuisut siulittaasuat Anders Brøns oqaaseqarumanngikkallarput.
