Puisit amii illersorneqarput

Danmarkip puisit amiisa tunisaanerat illersorpaa

Puisit amii Danmarkimi tunisaaginnarnissaat ullumi Danskit naalakkersuisuisa nalunaarutigaat.

Puisit amiisa canadameersut Danmarkimut eqquteqqusaajunnaarnissaat, Folketingip inuussutissat pillugit ataatsimiitsitaliaata danskit naalakkersuisuinut ullumi siunnersuutigigaluarpaat. Tamannali naalakkersuisut itigartilluinnarpaat .

Nunanut allanut ministeri Per Stig Møller aamma inatsisinut atortitsinermi ministeri Lene Espersen tusarniaavigineqaramik taama nalunaaruteqarput.

Puisit amiisa tunisaanerat ulorianartorsiortuarsinnarpoq, Danskilli naalakkersuisuisa ullumi Kalaallit puisit amiinik inuuniuteqarnerat tapersersorluinnarlugu nalunaarutigeqarput.

Folketingip inuussutissarsiorneq pillugu ataatsimitsitaliaa Nunanut allanut ministeri Per Stig Møller aamma inatsisit atortinneqarnerannut ministeri Lene Espersen tusarniaavigalugit qaaqquaat. Anguniarneqarporlu puisit amiisa Canadameersut Danmarkimut eqquteqqusaajunnaarnissaat. Soorlu Hollandimi aamma Belgieami taama iliorsimasut.

- Tamanna danskit naalakkersuisuisa itigartilluinnarpaat, kalaallit puisit amiinik tunisassiornerat puisinniartarnerallu eqqorneqassanngilluinnarpoq, Canadami naalliutitsilluni puisinik toqoraasoqartarneranik oqariartuuteqartoqarmat, taamaammat aamma folketingimi ataatsimiitsitaliap EU-p tungaaniit Canadami toqoraasarneq pillugu misissuisoqarnissaanik siunnersuuteqarnerput tapersersormassuk nuannaarpunga, Lene Espersen oqarpoq.

Taanna aamma oqarpoq EU-mi puisinniartarnermik misissuinissaq malinnaaffigeqqissaarneqartoq, naalakkersuisullu kalaallit eqqorneqannginnissaat ilungersuutigiuassagaat. - ikittuinnaat perulluliormata allat eqqorneqartariaqanngillat Lene Espersen raatiuaviisimut oqarpoq.