Puisit amii Canadami akikilligaluttuinnarput

EU-p puisit amiinik eqqussuinissamut inerteqquteqarniarnera naak suli atuutilinngikkaluartoq, Canadami puisit amiisa akiinut sunniuteqalereerpoq.

Amminik akitsorterussisarfissuit oqaatigaat, puisit amiisa siorna pisiarisamik pingasorarterutaannaat ukiormanna pisiarisinnaassallugit aamma ammit siorna akiisa affaannaannik akilerlugit pisiarisinnaassallugit. Tassa ameq ataaseq 150 koruunit imaluunniit 200 koruunit missaannik akilerlugu.

Simon Awa, Nunavummi avatangiisinut naalakkersuisoq oqarpoq, EU-mi puisit amiinik inerteqquteqarnermi, naggueqatigiit Inuit ilaatinneqannginnerat, naggueqatigiinnut Inunnut iluaqusiinngitsoq, tassami EU-miut takusinnaanngimmassuk naggueqatigiit Inuit inerteqquteqarnermi ilaatinneqannginnerat. Taamaattumik inerteqquteqarnerup kinguneranik akit appariangaatsiarnissaat naatsorsuutigineqarpoq.

Simon Awap aamma oqaatigaa, Nunavummi naalakkersuisut puisit amiinik pisiortulerniartut, eqqumiitsuliortunut mersortarfinnullu naammaginartumik akilersillugit tunisartagassaminnik, tamakkumi Nunavummi Canadamilu atorluarneqarsinnaammata.