Puisip amiinik atisaliat piumaqaat

Puisit amiinik atisaqarneq nuannarineqarpoq. Tamanna takuneqarsinnaavoq Københavnip aqquserngini iallanilu nuit amerliartuinnartut aaqqatinik, kaminnik jakkinillu puisip amiinik sanaanik atisaqartarmata.
decembarip 10-at 2010 11:06

Pisiniarfinnilu maannakkut puisit amiinik atisalianik tunisisarneq ajunngilluinnartumik ingerlavoq.

Great Greenlandip amernik kaattaassititsinerani kingullermi amiutini ukiut arlallit ingerlaneranni aatsaat maannakkut iluatsittumik tunivai, pisiniarfiillu arlallit nalunaarput puisit amiinik atisalianik soqutiginninneq annertusiartoqqilersoq. Aammattaaq tamanna malugineqarpoq pisiniarfimmi Greenland Artimi, Kalaallit Illuutaata kælderianiittumi.

Greenland Artimi sulisoq, Søs Nielsen ima oqarpoq.

- Aaqqatit, isersimmatit kamiillu piumaneqartorujussuupput. Kavaajat aamma tunisarpagut. Puisit amii nammineq mersorusuttunit aamma piumaneqartarput. Puisit amiinut soqutiginninneq annertusiartortoq malugisinnaavarput.

Puisit amiinik atisalianik soqutigisaqarneq malunnaatilimmik allisimasoq, Københavnip aqquserngisini malunnarpoq – ullumilu inuit pingasut puisit aminnik atortut naapippagut.

Mette Bødker, amernik kameqarlunilu aaqqatilik ima oqarpoq:

- Puisit amii nuannareqaakka. Puisit amiinik sanaanik kameqarpunga aamma massakkut puisit amiinik makittaasiaq aavara. Isumaqarpunga kialaarlutillu kusanartuusut. Aamma meeqqakka puisip amiinik aaqqasianik pisinikuuakka. Puisip amia kusanarluinnarami, tamaattunik piserusuttarpunga.

Daniella Pety, puisip amianik tungujortumik misutamik kavaajalik aamma naapipparput.

- Kusanarpoq qalipaataa tungujorami iluserilluni aammalu kialaarluni allanngussananilu. Isumaqarpunga puisip amia kusanartorujussuusoq, Daniella Pety oqarpoq.

Aviisimi Børsenimi atisanik naliliisartoq Lotte Freddie oqarpoq, puisit amiinik atisaliat ilumut nuannarineqaleriartortut.