Puisip amii kavaajaliarissallugit mutiujunnaarput
- Qallunaat atisassanik takutitsineri tamarmik takusarpakka. Ajoraluartumilli puisit amii taakkunani takussaavallaannginneri ugguarnaqaat, tassami puisit amii atisassaliassatut kusanarluinnartuugaluarput, qallunaallu atisassaliortartuisa atorneq ajormassuk ugguarnaqaaq.
Jim Lyngvild, atisassaliortartoq, assiliisartoq, aviisimilu Ekstra Blademi atisanik nutaanik immikkut ilisimasaqartutut oqaaseqartartuusoq taama oqarpoq. Canadamiut puisit ameerniutaasa qassiiliutaaneri peqqutaallutik puisit amiinik pisinissaminnut pisisartut tunuarsimaalersimaneri Jim Lyngvildip peqqutaasorivaa. Puisilli amiisa akunnattoorfiuneri aamma tikkuartuuppai.
- Minkit teriannissallu amii akisungaarmata aningaasarliorneq apeqqutaatinnerarani pisiarineqartarput. Asulu 80.000-inik akiliilluni amermik kavaajaliaq pisiariumanngikkaanni puisit amiinik kavaajalianik pisisoqartartoq. Taamaammat siornatigut puisit amiinik kavaajarsisinnaanikut maanna akissaarussimassasut isumaqarpunga. Puisimmi amiinik kavaajarsisartut aningaasarliornermit ullumikkut eqqugaasimaqaat. Jim Lyngvild taama oqarpoq.
Nunatta Ammeriviani pisortap Lars Bergip aningaasarliorneq aamma pisuutippaa.
- Atuisartut uagut tunisassiatsinnik pisiortorneri appariarsimaqaat. Europamimi annaasaqaatigisimasavut sualoqaat, puisillu amiinik EU´mut eqqusseqqusiunnaartoqarmat suli eqqortinnerluutiginerusimavarput. Lars Berg oqarpoq, nangillunilu.
- Ammit tunisassiat tunisarisartagarisimasavut ukuunerupput: taskit, qiterutit, støvlit skuullu. Kingullermik amminik atisassianik takutitsisoqarmat puisit amiinik skuuliavut nutaat saqqummiuppavut. Tamatuma saniatigut tunisassianik nutaanngorsaavugut, ilaatigut sullisit Kalaallit Nunaanni tunisassaqqivissut aamma neqeroorutigisinnaassallutigit. Aamma Kalaallit Nunaanni puisit amiinik tunisassiassanik nutarsaaneq sunaluunniit tapersersortuarparput. Lars Berg taama naggasiivoq.
Nunatta Ammeriviata puisit amiinik tunisai ikilieriarsimaqaat. 2004-mi Ammeriviup ammit 115.000-it tunivai, 2011-milu 26.000-iinnaat tunisimallugit. Lars Bergillu oqarnera malillugu 2013-imi amigartooruteqarani ingerlalernissaq siunertarineqarpoq. Tamatumunngalu Kinami tunisaqarluartalernissaq siunniussimaneqarluni.
