Puisinniat akilerlugit puisinniartarunnaarsinneqar-sinnaappat?

Hollywoodimi isiginnaartitsisartoq tusaamasaq aviangikkaarlu, Pamela Anderson, Sam Simonilu TV-kkut titartakkanik isiginnaagassiamit The Simposonimeersoq Newfoundlandimi St. John'simi sapaatit-akunnerani uani tikeraarput.

Pamela Anderson Amerikami uumasunik illersuiniaqatigiit sakkortusaarniarnerpaat ilaanni P.E.T.A.-mi ataqqinaammik pisortaavoq, Sam Simonilu puisinniarnermut akerliusut oqaaseqartartuattut ilisarisimaneqarluni.

Checkerujussuarmik 1 mio. dollarsinik aningaasartalimmik, tassa 5,5 mio. koruuninik aningaasartalimmik, nassarlutik St, John'simut tikipput, illoqarfimmi puisinniartartut kattuffiata puisinniarneq unitsitsissappagu checki taanna tunissutiginiarlugu.

Checkerujussuaq puisinniartartut kattuffiata allaffeqarfianukaappaat, sunaaffa ulloq taanna matoqqasoq, allaffeqarfiulli silataani puisinnianit ussattunit apeqqutinik "saassunneqartuusiinnarput".

Tusaamasarsuat taakku oqaatigaat puisinniat tamaasa puisinniartarunnaarsinnissaannut 1 mio. dollarsit naammannavianngitsut nalunagu, aningaasalli taakku aallarniutaasinnaanissaat neriuutigalugu, piniartullu puisinniartarunnaarsinnissaannut aningaasat pisariaqartut sinneri Canadap naalakkersuisuinit akilerneqarnissaat aammalu neruutigalugu.

Aviisi National Post naapertorlugu, Canadami TV-kkut isiginnaartitsisartoq tusaamasaq checkimik ilumoortuunngitsumik, aamma 1 mio. dollarsinik aningaasartalimmik, nassarluni takkussimavoq. Checkilu taanna Hollywoodimi isiginnaartitsisartut tusaamasat angerlartinniarlugit tunniunniarsarisimavaa, oqarluni nalinginnaliorunnaarlutik ilisimasaqarfiginngisaminnut akuliuttariaqanngitsut!