Puisi tamakkerlugu tunisassiariniarpaat
Suli Aps Maniitsumi puisinik ilivitsuutillugit tunisassiorfimmut Greenland Solution –mut Paamiunilu Ortooraq Møller-mit pigineqalissaaq.
Pusit neqaat, orsui amiilu tamakkerlugit tunisassiarineqartassapput, ilaatigut Koreakkunni pisisartussaqarnersoq paasinianeqareersimalluni, taama oqarpoq Ortooraq Møller, Suli aps-mi Paamiuni piginneqataasussaq.
-Maniitsormiut ilagalugit selskabilioqqammerpugut taassumalu selskabip suliarisussaassavaa tuniniaaneq. Taava assigiinngitsorpassuit paasiniaanerit ingerlanneqareersimapput, tassa Kangianut Koreakkunnut. Paasinarsisimagami pingaartumik puisip orsua, peqqissutsimut iluaqutaasoq. Tamanna qangarujussuarli misissueqattaarnerit uppernarsinikuuvaat, kisianni aamma paasineqarsimagami pinnersaasiornermut, tipigissaasiornermut, aamma atorluarneqarsinnaasoq, taama nassuiaavoq Ortooraq Møller nangipporlu,
maannakkut suna tamarmik eqaalliartorami tamatumunnga pissutaavoq nalinginnaasumik uuliap akitsorujussuarnera, tassa tamanna pissutaalluni qanga suliassat aporfipparpassuaqarsimasut massakkut eqaallilutik peraalinikuupput.
Taama oqarpoq Ortooraq Møller, Greenland Solution –p ataani Suli aps-issami Paamiuniittumi piginneqataasussaq.
Paamiuni piniartut puisimasorsuupput. Majip naanerani junillu aallartinnerani, ullut 14-it ingerlanerini Paamiuni puisit amiinik tunitsivimmit, Ortooraq Møller-mit ingerlanneqartumit, pusit amii 2500 –it missaanniittut Qaqortumi ammerivimmut nassiunneqarput. Tassalu taakkua neqaat tunitsivissaqanngimmata eqqaannarneqartariaqarsimallutik.
Qaqortumi Ammersivimmit ilisimatitsissutigineqarpoq nutaarsiassaanngitsoq ulluni makkunani nunarput puiserpassuaqartarnera, siorna piffissap taamaalinerani puisit amii 33.000 –it Ammerivimmut tunineqarsimasut ukioq manna ikinnerulaarlutik 30.000-usimallutik.
Kim Lyberth, Greenland Solution -mi Maniitsumiittumi pisortaq oqarpoq piffissami qaninnerpaami Paamiuliassallutik Ortooraq Møller-mik suleqateqarnissartik oqaloqatigiissutissagamikku.
