Puisi pillugu suliamut Namminersorlutik Oqartussat aningaasartuuteqaqqilerput
Nunatta eqqartuussiviani suliap ingerlanneqarnera Naalakkersuisunit naammagineqanngilaq. Naammaginngisaat marluupput. Siulleq, inatsisit tunngavilersuutigalugit naatsumik eqqartuussineq pimmat, aammalu aappassaanik, eqqartuussinermi pisoq tamaat ataatsimut isigalugu inerniliisoqarmat, naak eqqartuussinerit marluugaluartut.
Allatut oqaatigalugu, maanna Naalakkersuisut aningaasarpaaluit atorlugit anguniarniarlerpaat, piginneqatigiiffinni siulersuisuunerit akisussaaffii aamma siulersuisuunerit taarsiisinnaatitaaneri najoqqutassiuunneqassasut. Naalakkersusiunilli pingaartinneqarneruvoq, eqqartuussisulersuusseqqinnermi anguniarneqassasoq, pisortat piginneqataaffiini siulersuisuunerit qanoq akisussaaffeqarnissaat aalajangersaaffigineqassasoq.
Maannali apeqqutaaginnalerpoq, Puisi-mut tunngasoq Østre Landsrettemut ingerlateqqinneqarnerani akissaajaqqinnissat imminut akilersinnaanersut.
Nammisorlutik Oqartussat Inatsisilerinermut pisortaat, Jóhan E. Simonsen isumaqarpoq akissaajaataanavianngitsoq, tassami eqqartuussisulersuusseqqinnermi ilisimannittunik apersuisoqartussaanngimmat.
- Østre Landsrettimi ajugaassagutta, Nunatta Eqqartussiviani eqqartuussinermi akiligassagut 6 million koruunit akilertussaassanngilagut. Taamaattumik oqartoqarsinnaavoq aningaasanik sipaagaqassalluta. Ajorsaruttali soorunami aningaasartuutit amerlanerulissapput, maannali oqaatigisinnaanngilara qassinik aningaasartuuteqarnerlissalluta, Jóhan E. Simonsen oqarpoq.
Taanna isumaqarpoq suliaq Puisimut tunngasoq eqqartuussivimmi misilinneqartariaqartoq, tassami piginneqatigiinnermi inatsit tunngavigalugu, Nunatta eqqartuussiviani inerniliussaq atorsinnaasorinnginnamiuk, pissutigalugu siulersuisuunerit akisussaaffii inatsisilerinermi isiginiagassatut atorsinnaanngimmata.
- Tamassumalu uppernasinissaa pingaaruteqarpoq, tassalu tamannarpiaq tunngavigalugu Naalakkersuisut eqqartuussisulersuusseqqilerput, tamannalu aamma ima sigineqarsinnaavoq anigaasanik amerlanernik atuinissaq akuerineqartoq, taama Jóhan E. Simonsen oqarpoq.
