Puisi pillugu eqqartuussivimmi suliassaq ukiaru suliarineqassaaq

Ukiut arfineq-pingasut matuma siornagut, taamanikkut naalakkersuisuusut suliassaq Nunatta Eqqartuussivianut suliassanngortippaat. Maannalu puisit neqaannik pølsiliorfissatut pilersaarut piviusunngunngitsoortoq pillugu suliassap, Nunatta eqqartuussisuunerata ukioq naatinnagu naammassineqarnissaa naatsorsuutigaa.

Nunatta eqqartuussisuunera Søren Søndergaard Hansen ima oqarpoq:

-Puisi pillugu eqqartuussineq ataavartumik sapaatit akunnerini arfinilinni ingerlanneqartussaavoq, eqqartuussiviullu piffissaqarnissaata saniatigut inatsisilerituut illersuisussat piffissaqartariaqarput. Inuillu pineqartut amerlaqaat, unnerluutigineqarsimasut inatsisilerituunik illersuisoqartussat 13-iupput unnerluutiginnittoq inatsisilerituualu aamma ilaassallutik, oqarpoq.

Inatsisilerituut aamma allanik illersugaqarlutik suliassaqartarput, taamaammat ataatsikkut katersornissaat iluatsikkuminaattartoq oqaatigaa.

Eqqartuussinissarli ukiamut inissaqalersimavoq, sapaatillu akunneri arfinillit naammanngillat.

-Eqqartuussinerit inerneri nalilersoqqinneqassapput eqqartuussinerullu inernivia aalajangiunneqarluni, Søren Søndergaard Hansen oqarpoq.

Nunattali eqqartuussisuunerata aamma erseqqissarpaa Puisi pillugu eqqartuussineq ukioq manna naammassineqassasoq.

Puisi A/S puisit neqaannik pølsilianik Kinamut tuniniaasussatut aallartinneqaraluarpoq. Puisi A/S iluamik aallartinneqarnaniluunniit 2000-imi akiliisinnaajunnaarluni unippoq. Taamanikkut pilersaarut Namminersornerullutik Oqartussanut 50 millionit koruunit missaannik aningaasartuutaavoq. Taamanikkut suliniutitut pilersaarummi pisortaasoq Hans Peder B. Christensen aamma taamanikkut siulersuisuni siulittaasoq Lars-Emil Johansen kiisalu SIK-p siulittaasua Jess G. Berthelsen unnerluutigineqartunut ilaapput.