Puisi pillugu eqqartuussinissaq utaqqikatanneqarpoq

Puisi A/S pillugu eqqartuussivikkoortitsinissaq qaquguussanersoq suli ullulerneqanngilaq. Naalakkersuisut neriuutigaat suliaq ukioq manna aalajangiiffigineqarsinnaassasoq, eqqartuussutissamillu aappaagu aalajangiiniartoqassasoq.
februaarip 10-at 2010 04:39

Naalakkersuisut siulittaasuat Kuupik Kleist taama ilisimatitsivoq, Demokraatineersup Andreas Uldumip paragraf 36 naapertorlugu apqqutaanut akissuteqarluni.

Andreas Uldumip apeqqutigaa suliat eqqartuussivikkoortitat Puisi A/S-imut tunngasut sumut killinnersut.

Tunisassiorfik Puisi ukioq 2000-imi akiliisinnaajunnaarmat, Nunatta karsianut 50 millionit koruunit missaannik annaasaqaataavoq. Eqqartuussivikkoortitsiniarnermut ukiut arfineq-pingasut ingerlareerput. Inatsisartut aningaasaqarnermut ataatsimiititaliaata Inatsisartut ukiaq ataatsimiinneranni tamanna naammaginanngitsorujussuunerarpaat.

Sulisunik amigaateqarneq Nunatta Eqqartuussiviata utoqqatsissutigiuarpaa. Eqqartuussiveqarneq Danmarkimut suli atavoq, taamaammat danskit oqartussaasut iliuuseqartussaapput.

Kalaallit Nunaanni eqqartuussivinni suliat sivisuallaamik suliarineqartarneri pillugit danskit naalagaaffiat ataavartumik uparuarneqartartoq, Kuupik Kleist ilisimatitsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq