Puisi A/S pillugu eqqartuussinissaq kingurtinneqarpoq
Puisip neqaanik tunisassiorfiliarsuugaluaq Puisi A/S ukioq 2000-imili akiliisinnaajunnaarluni matusoq pillugu eqqartuussineq piaarnerpaamik ukiaru aatsaat eqqartuussivimmi suliarineqassaaq, taama aviisi Sermitsiaq allaaserinnippoq.
Allattoq Louise M. Kleemann
juunip 05-at 2008 09:17
Siorna septembarimi Radioavisimi oqaluttuarigaluarparput, tunisassiorfik oqartussat aningaasanik 50 millioni koruuninik amigartoorfigisaa pillugu suliaq 2008-p aallartilaarnerani eqqartuussivimmi suliarineqalissasoq.
- Ukiaru aatsaat suliarineqalissaaq, Nunatta Eqqartuussisua Søren Søndergaard Hansen ilisimatitsivoq.
Søren Søndergaard Hansenip ilanngullugu ilisimatitsissutigaa, Puisi A/S pillugu eqqartuussivimmi suliassap ukiaru qaqugukkut aallartinnissaa pillugu, unnerluussisoq illersuisorlu juuni naalerpat ataatsimeeqatigineqassasut.
Sooq suliap kinguarteqqinneqarnera pillugu aperineqarami, eqqartuussisuuneq akivoq:
- Nunatta Eqqartuussiviani ulapikkatta.
