Puisi-mut tunngatillugu suliaq sumut killippa?
- Inatsisartut Aningaasaqarnermut Ataatsimiititaliaata 2010-mi aningaasanut inatsisissatut siunnersuummut isumaliutissiissutaani Naalakkersuisunut isornartorsiuineq ersarippoq, ersarimmammi Naalakkersuisut Puisi A/S-imut Kalaallit Nunaata eqqartuussiviani eqqartuussinermut aningaasat atugassaasut aatsaat 2011-mut pilersaarutigineqarsimasut, Andreas Uldum ilaatigut allappoq, eqqartuussinerup ukioq manna aallarnerneqarnissaa Aningaasaqarnermut Ataatsimiititaliap kissaatigisimagaluaraa Andreas Uldumip aamma eqqaasitsissutigaa:
- Puisi A/S pillugu suliap eqqartuussivikkut suliarineqarnissaa suli piffissalerneqarsimanngitsoq Aningaasaqarnermut Ataatsimiititaliap paasivaa. Suliat ingerlanneqarnissaannut siusinnerpaamik 2011-mi aningaasartuuteqarnissaq naatsorsuutigineqartoq Naalakkersuisut paasissutissiissutigaat.
Suliassanngortinneqartut taamatullu innuttaasut eqqarsaatigalugit tamanna naammaginanngilluinnartutut oqaatigineqartariaqarpoq, Andreas Uldum ilaatigut allappoq.
Puisi A/S-imut tunngatillugu suliaq ingerlatsivinni siulersuisunut tunngassuteqartunut siunissami eqqartuussisulersuinissanut tunngaviusinnaassaaq, taamattumillu pingaaruteqarluni.
- Demokraatit Aningaasaqarnermut Ataatsimiititaliap eqqarsaatigisimasai isumaqatigai, taamaammallu suliap massakkorpiaq sumut killissimanera paaserusullugu, Andreas Uldum Inatsisartut suleriaasianni §36 naapertorlugu Naalakkersuisunut apeqquteqaammini naggasiilluni allappoq.
Puisi A/S-isiusimasoq pillugu suliaq Nunatta Eqqartuussiviani qaqugu aallartissanersoq ilisimaneqanngilaq. Nunatta eqqartuussisuunera Søren Søndergaard Hansen aallaqqammat oqaaseqartitsisinnaasimanngilarput, suliarlu qaqugu aallartissanersoq suli aamma aalajangerneqanngilaq.
