Puilasup ernganik tuniniaalernissaq qanillivoq

Schweitz-imeersut puilasup ernganik tuniniaaniartut oqarput, qanittumi ilisimatitsissutigineqassasoq, Nunatsinniit kikkut suleqataaniarnersut.

- Qeqertarsuarmi umiarsualiviup allinissaanik periarfissarsiorluni, maannakkorpiaq aqqartartut misissuipput, soorlu aamma aqqusinniornissaq misissorneqartoq, Greenland Spring Water-imi siulersuisuni siulittaasoq, advokati Adriano Vigano taama oqarpoq.

ThoCon-i Spring Water-imik piginnittuusoq oqarpoq, puilasup ernganik tunisassiulernissami soqutiginnitsitsilernissamilu aningaasanik 300 million koruuninik aningaasaliisoqarnissaa pisariaqartoq. Aningaasaliissutissat affaasa missaanniittut Kalaallit Nunaanni aningaasaliisussaaneersuussasut, ThoCon nalunaarpoq.

Kikkorpiaat aningaasaliisuussanersut qanittumi nalunaarutigineqassasoq siulersuisuni siulittaasoq oqarpoq.

- Aningaasaleeqataasussat kikkuuneri ullut 14-it qaangiuppata paasinarsinissaa naatsorsuutigaara, Adriano Vigano naggasiivoq.

Suliffeqarfiup naatsorsuutigaa, Qeqertarsuarmi puilasup ernganik tunisassiornissaq aappaagu aallartissasoq.

Taamatut pisoqassappat, Qeqertarsuarmi suliffissat 40-t 50-illuunniit pilersinneqassasut ThoCon oqarpoq.