Puilasup ernga pileritsaappaat!

decembarip 13-at 2005 11:35

Qeqertarsuarmi puilasup ernga suleqatigiilluni tunisassiarineqarsinnaanera pileritsaanneqarpoq. Maannalu Royal Greenlandip Schweiz-imi aningaasaliissuteqartarfik Tho-Con suleqatigalugu periarfissanik misissuillutik aallartipput.

Royal Greenlandip pisortaa Kjeld Askær Kangerlussuarmiittoq aperaarput, Royal Greenlandip sooq puilasup ernga tunisassiarissallugu soqutigineraa.

- Nalinginnaasumik niiverneq soqutigisaraarput, qeqertarsuarmilu tunisassiorfiuteqareerpugut ajunngilluinnartumik aammalu sulisugissaartumik.

- Suleqatigerusutagullu suleqatiginnikkusussappata, imermik puilasumik asseqanngivissumik tunisassiornissamut periarfisseerusuppugut. Taannalu imeq aamma inuussutissanik tunisassiornermi aamma atorneqartussanngorlugu, taama oqarpoq Royal Greenlandip pisortaa Kjeld Askær.

Taanna nassuiaavoq erngup puilasup tunisassiarinissaa sivisuumik oqallisaasimaqisoq.

Royal Greenlandip Schweiz-imi aningaasaliissuteqartarfik ThoCon suleqatiginiarpaa, taama suleqatiginnilerpoq, Qeqertarsuup kommuniata SIK-llu suliffissaqartitsiniarnermut aningaasaateqarfiata aammalu KNI-p ThoCon-imik suleqateqarnissaq itigartimmassuk.

Royal Greenlandillu naatsorsuutigaa, ThoCon niiveqatigiissutissaminik pilersaarumminik januaarip aallartinnerani saqqummiissasoq. Ilaatigullu oqaatigineqarpoq, aningaasaliisarfik taanna Schweiz-imiittoq Qeqertarsuarmi puilasup ernganik tunisassiulernissamut aningaasaliingaatsiarniartoq.

ThoCon-i selskabiuvoq niivertunut aningaasaliisartoq, aningaasaliisarnini atorlugu aningaasarsiortartoq, taamalu aningaasaliiffiit imminut akilersinnaasuusariaqarput, taamaanngippammi aningaasaliisinnaanaviannginnami. Qeqertarsuarni puilasup ernganut aningaasaliinissaq imminut akilersinnaasimammat aningaasaliiniarpoq, Kjeld Askær oqarpoq.

Kjeld Askær-ip aamma ilimaginerarpaa, puilasup ernga pissusissamisut tunisaalissappat suliffissat amerlanerulerumaartut.