Puiguttortut sullinneqarnerat pitsanngorsarneqassaaq

Inuit qassit puiguttornermik nappaateqarnersut ilisimaneqanngilaq. Suliaqartulli eqqoriarpaat, Nunatsinni puiguttortut 1000-it missaanniissasut. Puiguttortunut sullissinerup nukittorsarneqarnissaannik, Inatsisartunut ilaasortap Agathe Fontainip siunnersuutaa Inatsisartunit siullermeerneqarmat akuersaarneqarpoq.

Allattoq Jens Thorin

oktobarip 10-at 2008 11:20

Sonja Gudmundsson, Nuummi Utoqqaat Illuanni puiguttortunngorsimasunut immikkoortortami ataqatigiissaarisuusoq, oqarpoq puiguttortunngorsimasut maannamut eqqumaffigineqanngippallaarsimasut.

- Napparsimasoq allaanerusumik pissuseqaleraangat, sumik ajoquteqarnersoq ilaqutaasut oqaasertaliisinnaasanngillat. Maannali oqaasertaliisalerput, utoqqaallu illuini sulisut puigortortunngortup ilisarnaataanik maanna ilinniartinneqartalerput, Sonja Godmundsson oqarpoq.

ilaqutaasut eqqugaasarput

Puiguttortunik sullissisup ilaqutaasut ikiorneqarnissaat pisariaqartoq oqaatigaa.

- Ilaqutariit tamarmik isumaalunnermik aliasunnermillu napparsimalertarput, Sonja Gudmundsson oqarpoq.

Puiguttortunngornerup ilisarnaatai - kinaassutsikkut allanngorneq, kiserliulerneq annilaanganerlu - pillugit paasissutissanik Napparsimmavimmi aallertoqarsinnaasoq, puiguttortungorsimasunik ilisimasalik oqarpoq.

Puiguttortunngortut ilaquttanit kanngugineqartarpat?

- Ilaqutariittut allatulli nammineq ajornartorsiutitik allanit susassarineqanngitsutut immaqa isigisarpaat, nikanarsaataasinnaasut kanngunarsinnasullu allanut oqaatigissanagit. Aamma aappaasut uimi nuliamiluunniit nappaataa meeqqaminnut isertuuttarpaat, assersuutigalugu puiguttortunngortut natiinnarmut quisarnerat meeqqaminnut isertuuttarpaat. Kisianni isertuineq iluaqutaanani ajoqutaaginnartarpoq, ilaqutariit imminnut qasutittaramik, Sonja Gudmundson oqarpoq.

Puiguttortarneq pillugu pinaveersaartitsinissamik puiguttortunngorsimasunullu atugassarititaasut piginnaatitaaffiisalu nukittorsarneqarnissaannik Agathe Fontainip siunnersuutaa Inatsisartut akuersaarpaat, suliarlu ingerlaqqittussanngorpoq. Tamannalu puiguttortunik sullissisup nuannaarutigeqaa.

- Napparsimasorpassuit ilaqutaasorpassuillu pillugit suliassaq suliarisariaqarpoq, Nuummi Utoqqaat Illuanni puiguttortunngorsimasunut sullissinermi ataqatigiissaarisuusoq, Sonja Godmundsson, oqarpoq.

Puiguttortunngulernermut ilisarnaatit tassaapput:

1. Puigortalerneq, piffissami kingullermi maluginiarneqartalersoq, soorlu suliffimmi angerlarsimaffimmilu suliassanut sunniutilimmik.

2. Suliarisartakkat ilisimaarilluakkat suliariniarnerisa ajornakusoortittalernerat.

3. Oqalunnermik ajornartorsiuteqarneq.

4. Piffissap sumiiffiullu paatsiveeruttalernerat.

5. Naliliisinnaanerup killeqalernera.

6. Eqqarsaasersornermik ajornartorsiuteqarneq.

7. Assigiinngitsut inissarinngisaannut inissittalernerat.

8. Isumagissaarnerup pissusilersornerullu allanngornerat.

9. Inuttut allanngorneq

10. Suliniuteqarunnaarneq.