Puigortunngortut pillugit pilersaarut ukiamut kinguartinneqarpoq
Puigortunngortut pillugit pilersaarusiap siunertarineqartoq naapertorlugu sunniuteqassappat, ilaqutariinnermut ataatsimiititaliap immikkoortut 17-init ikinnerunngitsut piumavai.
Soorlu assersuutigalugu ullumikkut Kalaallit Nunaanni puigortunngorsimasut qasserpiaanersut ilisimaneqanngilaq. Missiliuussinermi - kisitsisit Danmarkimeersut tamatumunnga tunngasut tunngavigalugit - puigortunngortut 200-t missaanniissasut tikkuarneqarpoq. Kisitsisit taakkua eqqortuunersut aammattaaq puigortunngortut pillugit pilersaarummi ilanngunneqariaqarput.
Naalakkersuisut ilaqutariinnermut ataatsimiititaliap kaammattuuteqarnera tunngavigalugu maanna suleqatigiissitamik pilersitsiniarput, puigortunngortut paasiniarneqarnissaannut, katsorsartinnissaannut neqerooruteqarnissamut kiisalu inunnik isumaginninnikkut suliniutinut puigortunngortunut sammitinneqartunut iliuusissatut pilersaarummik pingaarnersiukkamik ilusilersuisussamik.
Suleqatigiissitaq naalakkersuisoqarfinniit kommuniniillu aallartitanik arlalinnik inuttaqassaaq.
Ukiuni qulikkuutaani aggersuni utoqqaat amerliartuinnartussaapput. Taamatut allanngoriartorneq ilutigalugu puigortunngortut taamaaqataanik amerliartussasut ilimagineqarpoq. Tassaappullu tamakku puigortunngortut pillugit pilersaarummi inuiaqatigiit piareersagassaat.
Soorlu assersuutigalugu paasissutissiiniaanerit qanigisanut sammisinneqartut, puigortunngortarneq immikkut sammillugu peqqinnissaqarfimmi sulisut ilinniartitaanerat kiisalu inissianik puigortunngortut pisariaqartitaat siumut eqqarsaatigalugit sanaartorneq.
