Puigortunngortunut pilersaarusiornissaq Inatsisartut isumaqatigiissutigaat
Puigortunngortut, qanga oqartarnerattut utertunngortut, siunissami amerliartussapput. Taamaattumik puigortunngortut ikiornissaannut pilersaarusiortoqassasoq, Inuit Ataqatigiinneersoq, Olga P. Berthelsen siunnersuuteqarpoq.
- Ukiut tallimat - qulit - 20-t qaangiuppata taamatut napparsimalersimasut paaqqutarinissaannut assigiinngitsutigut piareersimassagutta pilersaarusiortariaqarpugut, Olga P. Berthelsen oqarpoq.
Utoqqaat amerlanerujartortut puigortunngussapput. Nunatsinni taamatut nappaatillit maannakkut 200-inut missiliuunneqartarput.
Ukiunili tulliuttuni 30-ni innuttaasuni utoqqartaasut malunnartumik amerlisussaammata, puigortunngortut aamma amerliartussasut ilimagineqarpoq.
Puigortunngortunik ikiuinissamut pilersaarusiornikkut tamanna piarieersimaffigineqassaaq. Pilersaarut ilaqutaasunut paasisitsiniaanissamik, puigortunngorsimasunik peqqinnissaqarfimmi sullissisunik pikorissaanissamik, puigortunngorsimasunullu naleqquttunik inissialiornissamik imaqassaaq.
- Taamatut nappaatillit amerliartuinnartut paaqqutarinissaannut ilinniartitaanikkut piareersimanngilagut. Aamma puigortunngorsimasut ilaqutaasa sullinneqarnissaat pillugu pilersaaruteqanngilagut, Olga P. Berthelsen oqarpoq.
Puigortunngortut ikiornissaannut pilersaarusiornissaq Inatsisartuni ippassaq oqaluuserineqarmat amerlanerussuteqartut tapersersuipput. Siunnersuut peqqinnissamut ataatsimiititaliamut ingerlateqqinneqarpoq.