Puigortunngorsimasunut immikkoortortaqartariaqaraluarpoq
- Ullumikkut pissutsit imaapput puigortunngorsimasut utoqqaat angerlarsimaffiini najugaqartut amerlatsikkiartormata, taakkua ullumikkornit pistaanerusumik sullinneqarnissamik pisariaqartitsipput. Taamaammat utoqqaat angerlarsimaffii puigortunngorsimasunut immikkoortortaqartariaqaraluarput, Johanne Jerimiassen oqarpoq
Maniitsumi utoqqaat illuat nutaaq siorna pilersinneqarmat tassani inissat 44-t maannamut naammakkallartut oqaatigineqarpoq. Ukiulli qulit qaangiuppata inissanik amerlanernik pisariaqartitsisoqaqqilissasoq ilimagalugu, Maniitsumi utoqqaat illuani ittuusoq, Anders Kristiansen, oqarpoq.
Qaasuitsup kommuuniani taamaallaat Ilulissani Aasiannilu utoqqaat illui tattulerneqarsimapput. Aasianni utoqqaat illuata ilaneqarnissaa pilersaarutigalugu suliarineqartoq, borgmester Jess Svane oqarpoq.
